Mjeku Ilir Allkja këshillon qytetarët në lidhje me mënyrën se si duhet të përgatisim trupin tonë në mënyrë që të përballojmë sa më lehtë virozat që po qarkullojnë. Ai u shpreh se e rëndësishme është të qëndrojmë në ambiente të ajrosura mirë dhe të vishemi pak më trashë në momentet kur temperaturat ulen.
Mjeku sqaroi se një nga faktorët që ndikojnë në faktin se sa të rënda janë simptomat me të cilat përballemi, është edhe ngarkesa virologjike që marrim.
“Viruset kanë qenë dhe janë në ambientin rreth nesh, këtë nuk e shmangim dot. Ajo që mund të bëjmë është sjellja karshi viruseve dhe shëndetit tonë. Të përgatisim trupin për të pasur një organizëm sa më imun ndaj këtyre agjentëve që shpesh na sulmojnë, qofshin viruse apo baktere.
Mbrojtja ndikohet nga mënyra e të ushqyerit, stresi, ndotja ambientale, mënyra e ekspozimit, sepse nëse ekspozohemi në një sasi të vogël virusesh, ke më pak mundësi të sëmuresh, ndërsa në një vend të mbyllur për një kohë të gjatë, mundësia që viruset të shfaqin shqetësime dhe “pushtimin” e organizmit, rritet.
Duhet të trajnojmë veten që të kujdesemi për vetveten. Kur temperaturat janë të ulëta duhet të ndryshojmë veshjen. U them shpesh të rinjve që i shoh të veshur me rroba më të lehta, u them bukuria gjendet tek shëndeti, kur je i shëndetshëm je edhe i bukur.
Nuk është mirë të vizitojmë ambiente të mbyllura të populluara me shumë njerëz.
E mira është një ambient të jetë me dritare të cilët t’i hapim herë pas here. Është më mirë një ajër i ftohtë por i ndërruar se sa ambient i ngrohtë dhe me ajër që nuk qarkullon”, tha ai.
Discussion about this post