U mbajt dje në Tiranë në Sallën e koncerteve “Tonin Harapi” koncerti recital i këngëtares 16-vjeçare Ana Kodra. Ana promovoi albumin e saj të parë muzikor, i cili përbëhet nga 10 këngë.
Ana edhe pse në moshë ende të re numëron mbi 30 çmime të para ndërkombëtare dhe është nga të rrallat minorene në bote që ka fituar vizën e talentit në Shtetet e Bashkuara të Amerikës për aftësi të jashtëzakonshme në fushën e artit.
Ana ka firmosur disa kontrata shumë të rëndësishme në SHBA dhe së shpejti do zhvendoset atje për realizimin e këtyre kontratave.
Në këtë koncert ishin të ftuar edhe disa prej nxënësve të talentuar të Liceut Artistik dhe e ftuar ishte gjithashtu edhe këngëtarja e njohur dhe e dashur për të gjithë, Irma Libohova.
Në fund të dhjetorit 2022, Ana fitoi dy çmime të para në Festivalin Ndërkombëtar “Palma e Artë” që u zhvillua në Dubai.
Ky ishte një festival shumë i rëndësishëm i njohur globalisht, i cili u organizua nga WAPA (WORLD ASSOCIATION OF PERFORMING ARTS).
Ana mori pikët maksimale nga juria, e cila përbëhej nga personalitete të shquara të industrisë së muzikës, të njohur në nivel kombëtar dhe ndërkombëtar.
Në ‘Palmën e Artë’, Ana fitoi çmimin e parë për kategorinë e saj të moshës si dhe Çmimin e Madh të të gjithë festivalit duke e bërë atë lider të festivalit.
Ajo e sheh të ardhmen e saj në Amerikë dhe deri më tani numëron 5 kontrata të nënshkruara atje. Këto kontrata të nënshkruara janë:
Kontratë menaxheriale 5-vjeçare me Who’s that kid inc, menaxherja Kathleen Castro
Kontrata 1-vjeçare, e nënshkruar në dhjetor 2022 me David Kahne, producent, fitues i çmimit Grammy, i cili ka qenë nënkryetar në Columbia Records dhe Warner Bros Records. Është rënë dakord që Ana të këndojë këngë cover që do të shiten për produksione të rëndësishme, si kolona zanore për filma, reklama etj.
Kontratë 2 vjeçare me Loft Studio, Donnie Klang, producent.
Kontratë 1-vjeçare me “Stewart Talent Agency”, një nga agjencitë më të mëdha në SHBA që ka kontrata bashkëpunimi me televizione dhe produksione shumë të rëndësishme.
Kontrata për shpërndarjen dhe marketingun e këngës së parë që Ana publikoi “Asnjë djalë nuk vlen për lotët e mi”.
Dhe një tjetër kontratë u nënshkrua me Indistry Media që Ana të jetë Ambasadore e përfaqësimit të saj në mbarë botën.
Discussion about this post