Nuredin Dumani, njëri nga 4 bashkëpunëtorët e prokurorisë së posaçme SPAK ka dalë nga ambientet e burgut. Nën shoqërinë e oficerëve të BKH, është çuar në vendet ku ka zhvilluar takimet. Ai ka treguar se në ato vende ka rënë dakord për marrjen e porosive të vrasjeve.
Dumani është çuar në disa vende në Tiranë, Durrës, në Rrogozhinë dhe Elbasan. Ai ka identifikuar pikat e takimit mes personazheve të botës së krimit.
Nuredin Dumani është dëshmitari kryesor dhe më i rëndësishme i SPAK. Tre bashkëpunëtorët e tjerë janë Henrik Hoxhaj, Klevis Alla dhe Euglen Halili.
I shoqëruar nga oficerët e BKH-së dhe Policisë së Shtetit, Dumani mësohet të jetë çuar në Elbasan. Atje ka identifikuar pozicionin e goditjes në 29 Mars 2022, në zonën e Papërit.
Pikërisht në këtë vend, ai ka treguar trajektoren e lëvizjes, vendin e dorëzimit të një automatiku kallashnikov tek një person. Ai mbërriti atë ditë nga Elbasani në Papër si dhe momentin final të goditjes me armë nga Talo Çela.
Njëherësh, Dumani ka identifikuar dhe pallatin në Elbasan ku ka zhvilluar takim me Erjon Alibej dhe Arjan Spahinë. Me këta ka lidhur një marrëveshje për spastrimin e 7 personave.
Dumani ka çuar SPAK-un dhe BKH-në dhe në shtëpinë e braktisur në Krastë, ku siç ka treguar në rrëfimin e tij, në atë shtëpi ai ka takuar Florenc Çapjan, Bledar Muçën dhe Ervis Çaushollin, ku së bashku kanë diskutuar planin për vrasjen e Sokol Sanxhaktarit, dhëndrit të ish-kryebashkiakut të Elbasanit Qazim Sejdini.
Njëherësh Nuredin Dumani, i ka treguar SPAK dhe pikat e takimit që ka bërë me disa personazhe në Tiranë, ku një ndër to është dhe lokali ku është takuar avokatin Alban Bengasi.
Po kështu Dumani ka çuar SPAK dhe tek hyrja e një garazhi në Durrës, ku siç pretendon ai, së bashku me Talo Çelës kanë vrarë për llogari të Fetsim Qolit, Fatmira Dedaj, nënën e Ervis Dedaj.
Në rrëfimin e tij dhënë në SPAK, Dumani ka treguar dhjetëra emra të botës së krimit, me të cilët ai ishte takuar dhe kishte rënë dakord për të kryer vrasje.
Pjesën më të madhe të vrasjeve Dumani i ka kryer me pagesë, duke ekzekutuar shokët e tij të ngushtë me të cilët ai disa kohë më parë kishte kryer vrasje.
Discussion about this post