Dumani është një vrasës që i shërben drejtësisë vetëm për të pohuar urdhërat që i janë dhënë…
Publikimi i skandalit të Nuredin Dumanit nga burgu, ku ka mundësi të veprojë për të kryer krime të tjera, është ngjarja më e tmerrshme që mund t’i ndodhë një vendi. Pasi një person që ka firmosur një marrëveshje si i penduar i drejtësisë, së pari duhet të ndalë së qeni subjekt kriminal.
Megjithatë, duhet të kemi parasysh se jetojmë në një vend ku burgjet nuk janë institucione të sigurisë së lartë, ku i dënuari është i izoluar; përkundrazi në burgjet tona, përveç lirisë, të burgosur të veçantë kanë më shumë fuqi dhe mundësi se ata që janë jashtë.
Në këtë rast, duhet parë se a është defekt i sigurisë së burgjeve që Nuredin Dumani ka thyer sistemin, apo është pjesë e marrëveshjes, një liri që i është dhënë që në fillim të rekrutimit të tij. Por në momentin që Dumani, urdhëron ngjarje kriminale si tritoli ndaj Xhovana Nikollit, atëherë ai e ka prishur marrëveshjen. Këtu kemi të bëjmë me dy probleme: nëse Dumanit i janë dhënë në burg hapësira më të mëdha se kontrata që ka nënshkruar, ka faj administrata e burgjeve; por nëse e ka shkelur kontratën, atëherë hapet debate se sa vlen ai si i penduar, një kriminel që vijon aktivitetin.
Ligji për këtë është i qartë; shteti i jep favor dëshmitarit të mbrojtur aq sa ai tregohet i hapur për të dëshmuar. Por nëse prish marrëveshjen, ai nuk është më dëshmitar dhe as i penduar. Gjithsesi këtu është kleçka, pasi Dumani, më shumë se tani, do të jetë i vlefshëm në Gjykatë, kur do të përballet me avokatët e personave që akuzon. E kjo kushtëzon edhe llastimin e tij të deritashëm, dhe këtë Nuredini e di mirë. Deri sa të shkojë në gjykatë, ku sipas gjasave do të marrë një dënim të konsiderueshëm, se ka bërë mjaft vrasje, vrasësi i penduar do bëjë qejf. Sepse e di që nuk del nga burgu. E në fakt edhe vetë ai e di që nuk shpëton dot lehtë, edhe pse ka firmosur një kontratë bashkëpunimi.
Sepse Dumani nuk është një Tomasso Buschetta! i penduari i parë zyrtar i Cosa Nostra-s, nuk ishte një vrasës ekzekutor, edhe pse në rininë e tij kishte kryer vetëm një vrasje me porosi. Ai ishte një ‘dealer droge’, një personazh që lidhte fijet e narkotrafikut me paratë e mafias siçiliane. Por Buschetta, me dëshminë e tij tregoi 50 vjet histori të Cosa Nostra-s, duke ndihmuar Giovani Falconen që t’i gjejë të gjitha paratë e krimit të organizuar. Dumani, pranoi të bashkëpunojë, sepse e di që jeta jashtë është vdekja e tij. Natyrisht edhe Buschetta apo të penduar të tjerë, pranojnë të bashkëpunojnë kur e shikojnë këtë gjë si mundësi të fundit. Por nga ajo që thonë, që dëshmojnë, tregojnë peshën e tyre në shoqëri. Nuredin Dumani nuk ka lidhje tjetër me grupet kriminale, por thjesht ka bërë plane për të vrarë njërin apo tjetrin sipas porosive që i vinin nga kapobanda të ndryshme. Dumani është një vrasës që i shërben drejtësisë vetëm për të pohuar urdhërat që i janë dhënë.
Por ka edhe një kleçkë të rëndësishme që e dallon Dumanin nga Bushcetta. Nuredin Dumani ka qenë prej kohësh, edhe para se të prangosej një person i njohur i krimit. Ama motra e tij punonte në një post të rëndësishëm në adminisratë, si e rekomanduar prej tij. I penduari i rëndësishëm i mafias siçiliane, jo vetëm që nuk i është afruar shtetit, por e kishte zët, sepse shtetin e konsideronte më të keq se Cosa Nostra.
Madje SPAK pikërisht këtë pjesë duhet të hetojë, si Nuredin Dumani ka gjetur lidhjet në qeveri dhe mazhorancë për të punësuar njerëzit e afërt. E këtu nuk ka përse ndëshkohet vrasësi serial, por njerëzit e politikës që e kanë pranuar si patronazhist…/Pamfleti
Discussion about this post