Ka vijuar edhe sot dëshmia e të penduarit të drejtësisë Nuredin Dumani mbi dosjen “Plumbi i Artë”. Ai ka deklaruar se për vrasjen e Lulëzim Mashës është “kontraktuar” nga Suel Çela. Në seancë ai ka deklaruar se pagesa ishte 150 mijë euro, por se “punën” ia ka deleguar Henrik Hoxhës të cilit i ka dhënë fillimisht 10 mijë euro.
“Kur kam shkuar në Kosovë isha në kërkim, për Dorian Shkozën dhe Anxhelo Avdinë. Atje kam qëndruar deri natën që i ra Rusia Ukrainës. Henrikut i kam premtuar për vrasjen e Lulëzim Mashës 150 mijë euro. I dhashë 10 mijë euro si paradhënie”, tha ai.
Ndërkohë Henrik Hoxha ka deklaruar se porosia është marrë për djalin e Lulëzim Mashës.
“Nuk u gjend ai dhe pastaj shkoi porosia për Lulëzim Mashën, që ai të vinte tek varrimi. Porosia ishte nga sakati, Aleksandër Baho”, tha ai.
Dumani ka vijuar me faktin se në aplikacionin “Matrix” ashtu si edhe në “Sky” ka mbajtur pseudonimet “Alkatraz”, “Covid19” dhe “Toto Rina”.
“Henrikut s’e mbaj mend si e kishte emrin në SKY, por unë ja kisha vënë “Baftjari”. Në Kosovë e kam takuar disa herë Aleksandër Bahon. Ka ardhur me makinat e veta, njëherë me një CLS, njëherë me një Audi A8. Ka ardhur edhe për qef në Kosovë, të takohej me mua. Porosinë për Lulëzim Mashën ma la dhënë Suel Cela. Më tha, që e ka për persona të tjerë. Përveç Celës për këtë vrasje kam folur me Aleksandër Bahon. Kontaktin me Suel Çelën ma ka dhënë Fatmir Troplini. Porosinë e Suelit e mora për interes, fillimisht për 150 mijë euro e pastaj për 200.
Sueli nuk më ka treguar ndonjëherë për arsyen e kësaj porosie. Kur i tregova Henrikut, më tha që e njoh Lulzim Mashën dhe që është plak i mbaruar. Punën ja dhashë Henrikut.
I kam dhënë disa mjete për këtë punë, një golf 4, dy armë, një “UZI” dhe një pistoletë 19mm”, tha ai.
Discussion about this post