Nuri Belba i Bashkisë Prrenjas e ka shkrepur një tjetër tender a garë. Çudia e kryebashkiakut në fjalë por edhe të homologëve të tij është se bëjnë punë që duhet t’i kishin kryer më parë edhe i shesin si investime dhe përpjekje të mëdha për popullin.
Kështu po e parqet Belba tenderin në fjalë, në fakt dokumentet e prokurimit na tregojnë se sa pas dorë lihen shërbimet në këtë bashki dhe si vidhen para duke justifikuar nevojat emergjente.
Tenderi për të cilin do flasim ka si objekt ‘Rikonstruksion i kanalit të Lingajcës , faza II, fshati Rrajce’. Ky përrua ka nevojë për një ndërhyrje urgjente, por që në fakt duhej bërë shumë më parë.
Në dokumentet që shoqërojnë prokurimin thuhet se, kanali kryesor i këtij përroi është në gjendje kritike për shkak se për vite nuk është bërë asnjë ndërhyrje, kështu nga rrëshqitjet e dherave ka bllokime, shembje dhe bëhet rrezik përmbytje për tokat aty pranë sa herë që ka shira të rrëmbyeshëm.
Pra banorët e kësaj zone kanë qenë prej vitesh në rrezik vetëm, se bashkia nuk ka marrë mundimin të ndërhyje në 500 metra kanal.
Tenderi pa garë
Tani Belba zotohet se do të ndërhyjë ai, por sërish në dokumente na tregohet se në fakt fokusi i kryebashkiakut është përfitimi i fondit. 170 milionë lekë ka lënë në dispozicion Belba dhe me manovrat që ka bërë sigurisht që një pjesë do ta përfitojë vetë.
Gara ka qëndruar e hapur deri më 11 tetor dhe gjatë kësaj kohe janë dorëzuar 13 oferta, për të cilat nëse Belba do kishte gjetur kohë t’i shqyrtonte sipas ligjit do të jepej mundësia për një garë të fortë.
Por konkurrenca e drejtë midis shumë ofertave i pakësonte Belbes shanset për të futur ndonjë lekë në xhepin e tij. Prandaj ai nuk vonoi shumë por s’kualifikoi të 12 ofertat që nuk kishte asnjë marrëveshje dhe i hapi rrugën firmës OuenShpk. Indiciet thonë se me këtë kompani i ka bërë pazaret e fshehta qysh në fillim të garës Belba, pasi ajo nuk ka ofertën më të lirë dhe nuk ka patur asnjë konkurrentë përballë.
BOE T&J Construction shpk & APIS CONSTRUCTION shpk, NIKA shpk dhe BOE “M U R A T I” shpk 39.50 % & LIS KONSTRUKSION kishin oferta më të lira se fituesi. Por, komisioni i Belbës i ka konsideruar si anomalisht të ulëta dhe bashkë me kompanitë e tjera i ka fshirë që në fazën e parë të garës.
Në fazën finale gjithçka ndodhi shumë shpejt, u firmos menjëherë kontrata me OuenShpk!
Tenderi sot mban Flamurin e kuq, gjithashtu edhe situata në këtë zonë është në vijën e kuqe, ndërsa Belba parashikon që punimet të mbarojnë në dhjetor. Epo lutemi që në Rrajcë të mos bjerë shi i rrëmbyeshëm për këtë muaj, se s’kemi çfarë bëjmë kaq vonë u kujtua kryetari!
Discussion about this post