Ish këshilltari i Bashkisë Shkodër, Fatlum Nurja ka reaguar në rrjetin social Facebook duke hedhur një tezë, e cila hap diskutim për situatën e krijuar brenda partisë demokratike, jo vetëm në qendër por edhe në rrethe.
“Përse nuk flasin Deputetët e Shkodres (PD) për ngjarjen politike më të rëndësishme në Partinë Demokratike?! “ shkruan Nurja.
Me tej, Nurja shton edhe një pytje retorike…“Nuk janë të qartë apo nuk janë të aftë të prononcohen për diçka të tillë?!”
Pak ditë më parë, Kryetari i Partisë Demokratike të Shkodrës Xhevdet Amuli pas takimit me Lulzim Bashën u shpreh se dega që ai drejton është me PD-në dhe Amerikën dhe se brenda forcës kryesore opozitare nuk ka asnjë përçarje, pasi armiku i vetëm është Edi Rama.
“Kjo është diçka më shumë se qëndrimi i Bashës. Ne jemi pro amerikan. Ne jemi të tërë me Amerikën, edhe Sali Berisha vetë është me Amerikën. Nuk ka asnjë arsye që partia të ketë çarje. Ne Berishën e kemi pasur lider shpirtëror, nuk ka arsye që të ketë përçarje.
Ne jemi me PD-në, PD është familje e madhe. Edhe Berisha është me PD-në. Ne të gjithë bashkë jemi me PD-në dhe me SHBA-në. Ky është verdikti i Amerikës. Nuk kemi me asnjë përçarje dhe fraksion, ne luftën e kemi me PS-në dhe Edi Ramën dhe jo brenda llojit” tha Xhevdet Amuli.
Sa i takon deputetëve të partisë demokratike të kryeqendrës së Veriut, Helidon Bushati dhe Zef Hila janë shfaqur pranë Bashës që në momentin kur ky i fundit përjashtoi Berishën nga grupi parlamentar.
Zef Hila ka qenë krahu i djathtë i Bashës, në momentin kur ky i fundit ka dal nga selia blu dhe është pritur me protestë nga simpatizantët e kësaj selie.
Por, afër Bashës nuk kanë munguar as Greta Bardeli dhe Emilia Koliqi.
Asnjë nga këta katër deputet nuk ka reaguar në lidhje me vendimin e Bashës. Por, duket fare qartë se këta të fundit dakortësohen me vendimin e tij, që në momentin kur i kemi parë bashkë dhe asnjëri nuk ka kundërshtuar, por kanë zgjedhur të heshtin dhe të shfaqen më Lulzim Bashën.
Nuk dihet akoma në qoftë se ky parlament do të ketë zëra që do flasin për Shkodrën, apo këta deputetë do të qëndrojnë të heshtur siç ka ndodhur edhe vite më parë.
