Në një botë ku politikanët kërkojnë legjitimitet përmes votës, Edi Rama duket se e kërkon përmes “like”-ut. Dhe këtë herë, nuk mjaftoi më as Brukseli, as Davosi, as Parisi – duhej një tryezë mishi, pak kripë me stil dhe një dorë që bëhet meme: Nusreti.
Në finalen e Champions League, mes yjesh të futbollit dhe VIP-ash të vërtetë, Nusret Gökçe – mjeshtri i mishit dhe spektaklit – hodhi foton e radhës. Por në vend që të spërkaste mishin, spërkati Instagramin me një superlativ: “More than a king”, shkruar për askënd tjetër veç Edi Ramës.
Po, për Nusretin, Rama nuk është më thjesht politikan. Është më shumë se një mbret. Është piper i fortë. Është brand. Është garniturë luksi në tryezën e famës ndërkombëtare. Dhe si çdo pjatë që serviret për audiencë, ka një synim të qartë: të hajë mendjen e publikut.
Ironia? Kjo pjatë është përgatitur me përbërës që shqiptarët s’i prekin dot as në ëndërr: bileta të shtrenjta, lozha VIP, kripë me çmim flori, e mbi të gjitha – një pushtet që shitet si stil jetese, jo si përgjegjësi. Kjo nuk është më politikë, është marketing personal me shije “medium rare”.
Edi Rama e shijon pushtetin siç Nusreti shijon mishin – me shumë zhurmë, shumë shfaqje dhe shumë pak përmbajtje. Në vend të bilanceve, ka selfie. Në vend të reformave, ka ngjyrë flokësh. Në vend të përballjes me realitetin shqiptar, ka tribuna nderi dhe buzëqeshje në Dubai, Milano apo Stamboll.
Ndërsa Shqipëria fundoset në emigrim, në varfëri të heshtur dhe në zhgënjim të përditshëm, Kryeministri i saj është kthyer në ikonë Instagrami. E ndërsa qytetarët paguajnë shtrenjtë për të ngrohur shtëpinë, për të mbajtur fëmijët në shkollë, apo për të ikur me gomone, Rama pozon në arenat ku bota argëtohet dhe harxhon.
A është faj i Nusretit që nuk e di realitetin shqiptar? Aspak. Nusreti sheh një “VIP” që di të shesë veten. Dhe në botën e tij, kjo mjafton. Por është një tjetër dimension kur ai “VIP” është kryeministri i një vendi që nuk ka mjekë, nuk ka shkolla, nuk ka drejtësi dhe nuk ka shpresë. Sepse ndërsa Nusreti hedh kripën si show, Rama ka hedhur kripë mbi plagën e një populli të tërë.
Kështu që po – për Nusretin ai është “piper”. Por për shqiptarët, ai është receta që nuk ngop. Është shija e një pjate të shtrenjtë, të zbrazët, që serviret me fjalë të mëdha, por lë barkun bosh.
Nëse Rama është më shumë se një mbret, atëherë Shqipëria është më pak se një republikë.
gijotina.com/
Discussion about this post