Presidenti rus, Vladimir Putin i ka dhënë të hënën shtetësinë ruse ish-kontraktorit të inteligjencës amerikane, Edëard Snouden.
Presidenti rus e ka marrë këtë vendim nëntë vjet pasi Snouden e ka bërë publike mënyrën si kryen vëzhgime Agjencia Kombëtare e Sigurisë (NSA) në Shtetet e Bashkuara. Snouden, 39-vjeçar, ka ikur nga Shtetet e Bashkuara dhe ka fituar azil në Rusi.
Më 2013, ai pati folur publikisht për operacionet e brendshme dhe ato ndërkombëtare të agjencisë amerikane, njëherësh vendin e tij të punës. Autoritetet amerikane kanë kërkuar me vite kthimin e tij në Shtetet e Bashkuara, ku përballet me akuzat për spiunim.
Snouden nuk ka reaguar ende, pasi Kremlini ka publikuar listën e 72 individëve që Putin u ka dhënë shtetësinë. Më 2020, Rusia i ka dhënë Snoëdenit lejeqëndrim të përhershëm, duke i hapur rrugën për aplikim për shtetësi.
Putin, ish-shef i spiunëve në Rusi, ka thënë më 2017 se Snouden ka gabuar kur ka publikuar sekretet amerikane, mirëpo nuk është tradhtar.
Vetë Snouden nuk paraqitet shumë para mediave, prej kohës kur ka nisur të jetojë në Rusi./REL
Discussion about this post