Agron Llakaj, një prej emrave të njohur të skenës dhe humorit shqiptar, së fundmi ishte i ftuar në emisionin e “Vizionit të Pasdites”, ku ndër të tjera ka folur për mungesën e madhe që ndjen nga humbja e motrës dhe babait.
Llakaj tha se humbja e motrës ka ndikuar në raportin që tashmë ai ka me vëllezërit e motrat pasi ishte një ikje e madhe. Ndërkohë shtoi se shpesh e kërkon babain e tij për bashkëbisedim, ndërsa theksoi se kur shkon te nëna i mungon shprehja e të atit, “O Goxho, ku je?”.
“Zoti nuk më kishte mësuar me vdekjen. Momentin e parë ishte me motrën dhe më tepër pamundësia ishte për t’iu gjendur sepse u shtrua në spital, Covidi nuk lejonte komunikimin dhe na iku vetëm si zë. Thjesht i dëgjova zërin. ‘Kam ftohtë’,-tha. Ajo ishte goditja e parë.
Jeta vazhdon dhe në raport me vëllezërit dhe motrat, nuk jemi më ata që kemi qenë se humbja nuk ishte e vogël. Gjithmonë me atë që kështu ishte një zgjedhje e Zotit dhe duke e respektuar si të tillë, por pa e menduar se pas saj do të vinte largimi i tim ati, që lidhja ime me atë ka qenë e jashtëzakonshme.
Dikush që e dëgjonte thoshte 88, ka jetuar plot, por ai ishte babai im. Ka momente që e kërkoj për të bashkëbiseduar. Sa herë që shkoj te mamaja më mungon një “O Goxho, ku je?”.
Dhimbja mbetet, por babai im aq i mirë, aq i ngrohtë. Por, jam i lumtur sepse një pjesë të tij e trashëgoj unë. Me gojëdhënat që fliste im atë, unë ndërtova një personazh Temën, babai thoshte të qeshin njerëzit”, tha Llakaj.
Discussion about this post