Vlora vijon të përballet prej disa ditësh me një krizë të thellë të furnizimit me ujë të pijshëm, situatë që ka nxitur protesta të qytetarëve dhe përfaqësuesve të shoqërisë civile përpara Bashkisë. Protesta ka sjellë tensione, teksa qytetarët kanë kërkuar zgjidhje të menjëhershme për mungesën e ujit.
Gjatë protestës, disa qytetarë kanë tentuar të futen brenda godinës së Bashkisë dhe janë përplasur me forcat e policisë. Ata kanë goditur derën kryesore me bidona uji dhe kanë kërkuar takim me kryetaren e Bashkisë, duke shprehur indinjatën për situatën e krijuar.
Protestuesit kanë qëlluar me vezë godinën e bashkisë Vlorë dhe punonjësit e policisë.
“Duam ujë, ujë. Ujë o ujë. O qeveritarë të poshtër, duam ujë. O maskarenj, o të degjeneruar. Pa ujë nuk ka jetë. O maskarenj që jeni në pushtet. Ka 5 ditë pa ujë. Po zihemi me fëmijët se duan të lahen. I paçi haram ato votat”, shprehen të revoltuar qytetarët.
Të revoltuar qytetarët drejtojnë gishtin drejtit pushtetit qendror dhe atij lokal. Një prej qytetarëve i revoltuar mbante në dorë pankartën “Ujësjellësi i Lubisë”.
Ndërsa një tjetër qytetare e quajti ministren Balluku “kuçedra”.
“Janë tenderua miliona euro. E kanë katandisur Vlorën në këtë derexhe. Dje donin të bënin mbrëmje gala. Zonja e 7 % të dalë dhe të japë llogari për 26 vitet e keq menaxhimit. Sot Vlora nuk është më Vlorë, dhe sot turpi ka një emër bashkia Vlorë. Ne jemi vlonjatë dhe nuk jemi talebanë”, tha nje tjeter qytetar.
“I vraftë Zoti, jemi në prag të një epidemie”, është shprehur një tjetër qytetar.
Sipas autoriteteve, kriza është shkaktuar nga një defekt në linjën kryesore të ujësjellësit, ndërsa ndërhyrjet për riparim kanë dështuar për shkak të presionit të lartë që vijon të dëmtojë tubacionet. Mijëra familje mbeten pa ujë, ndërsa disa qytetarë janë detyruar të mbushin bidona nga burime alternative. Shërbimet kritike, përfshirë spitalin dhe institucionet e rëndësishme, po furnizohen përmes boteve të zjarrfikësve nga burimi “Uji i Ftohtë”.
Discussion about this post