Të martën e kësaj jave, zyrtarët e OBSH-së, u shprehën në një konferencë për shtyp se koronavirusi do të bashkëjetojë me ne pasi vazhdon të pësojë mutacione në vendet e pavaksinuara në gjithë botën dhe shpresat për ta zhdukur atë janë zvogëluar.
“Unë mendoj se ky virus është këtu për të qëndruar me ne dhe do të evoluojë si viruset pandemike të gripit, do të evoluojë për t’u bërë një nga viruset e tjerë që na prek periodikisht,” tha në një konferencë për shtyp Dr. Mike Ryan, drejtor i Emergjencave Shëndetësore të OBSH-së.
Më herët edhe këshilltari kryesor mjekësor i Shtëpisë së Bardhë Dr. Anthony Fauci dhe Stephane Bancel, CEO i Moderna, kanë paralajmëruar se botës do t’i duhet të jetojë përgjithmonë me Covid, ashtu si me gripin.
Ryan shtoi se ka shumë pak gjasa që COVID-19 të eliminohet plotësisht dhe kjo sipas tij ka ardhur nga mos reagimi në kohë kundër tij.
Nëse bota do të kishte ndërmarrë hapa të hershëm për të ndaluar përhapjen e virusit, situata sot mund të kishte qenë shumë e ndryshme, thanë zyrtarët e OBSH-së.
“Ne kishim një shans në fillimin e kësaj pandemie,” tha Maria Van Kerkhove, drejtuesja teknike e OBSH-së për Covid-19.
