Covid- 19 vijon të jetë i “ashpër” dhe mund të japë goditje të rëndë javët e ardhshme në Europë.
Organizata Botërore e Shëndetit jep alarmin dhe parashikon nga tani deri më 1 dhjetor në Europë mund të regjistrohen 236 mijë viktima të tjera për shkak të Covid -19.
Kjo u raportua nga drejtori i OBSH në Europë, Hans Kluge, ku tha se numri i viktimave është rritur me 11% në një javë. Ai u shpreh se të dhëna janë shumë shqetësuese edhe për shkak të shkallës së ulët të vaksinimit.
Rritja e infeksioneve, shpjegon OBSH, vjen si rezultat i përhapjes së shpejtë të variantit Delta, lehtësim të kufizimeve dhe rritjes së numrit të udhëtimeve dhe lëvizjeve të kryera gjatë muajve të verës.
“Ne duhet të jemi të vendosur për mbajtjen aktive të masave të ndryshme mbrojtëse, duke përfshirë edhe fushatën e vaksinimit dhe përdorimin e maskave. Vaksinimi është mënyra më efektive për të filluar hapjen dhe stabilizuar ekonominë”, përfundoi Kluge.
