Kreu i Organizatës Botërore të Shëndetësisë Tedros Adhanom Ghebreyesus ka bërë thirrje sot për vendosje të moratoriumit për dozat e treta të vaksinave për Covid-19. Ghebreyesus kërkoi që moratoriumi të qëndrojnë në fuqi të paktën deri në fund të shtatorit.
Sipas tij, kjo lëvizje mund të t’i japë mundësinë të paktën 10 për qind të popullsive të çdo vendi që të vaksinohet. Po ashtu, sipas ekspertëve të OBSH, nuk është vërtetuar ende që dozat e treta janë efektive.
Adhanom Ghebreyesus u shpreh:
“Ndërkohë që miliona njerëz janë ende duke pritur për dozën e parë, disa vende të pasura po vazhdojnë me dozat e treta. Deri më tani, më shumë se 4 miliardë doza vaksinash për Covid-19 janë administruar globalisht. Më shumë se 80% kanë shkuar për vendet me të ardhura të larta apo të mesme, edhe pse në to jeton më pak se gjysma e popullsisë së botës.”
Javën e kaluar, presidenti izraelit Isaac Herzog mori dozën e tretë të vaksinës kundër koronavirusit duke nisur kështu një fushatë të dozave përforcuese për personat mbi 60 vjeç. Franca, Gjermania dhe shumë vende të Lindjes së Mesme gjithashtu do të fillojnë të administrojnë doza të treta.
