Shirat e rrëmbyeshëm që goditën rajonin e Odesës, në Ukrainën jugore kanë vrarë të paktën nëntë persona, përfshirë një fëmijë, njoftuan shërbimet e emergjencës.
“Gjatë gjithë natës, ekipet e shpëtimit ndihmuan në evakuimin e njerëzve të bllokuar nga përmbytjet”, thanë shërbimet e emergjencës në Telegram, duke postuar foto të makinave të zhytura dhe ekipeve të shpëtimit që ndihmonin banorët.
Kryebashkiaku i Odesës, Guennadiï Troukhanov, raportoi gjatë natës se ekuivalenti i reshjeve normale të dy muajve kishte rënë në qytet në shtatë orë.
“Asnjë sistem kanalizimesh nuk mund t’i rezistojë një ngarkese të tillë”, shtoi ai.
Këto stuhi vdekjeprurëse vijnë ndërsa Ukraina vazhdon të vuajë bombardime të përditshme nga ushtria ruse, e cila kontrollon afërsisht 20% të territorit tre vjet e gjysmë pas nisjes së pushtimit të saj në shkallë të gjerë.
Sipas administratës ushtarake lokale, në Kherson (jug), një burrë vdiq sot në mëngjes në një sulm rus.
Në Kharkiv (verilindje), autoritetet raportuan sulme të mëdha gjatë natës, të cilat plagosën gjashtë persona, përfshirë një oficer policie, sipas policisë kombëtare.
Discussion about this post