Ofendimet raciste janë bërë shumë të shpeshta dhe shqetësuese për futbollistët thuajse në çdo kampionat.
Kjo ka qenë arsyeja pse qeveria e Mbretërisë së Bashkuar ka konfirmuar prezantimin e një ligji të ri, i cili do të hyjë në fuqi në fillim të vitit 2022, që do t’i ndalojë abuzuesit racistë në rrjetet sociale të ndjekin ndeshjet e futbollit deri në 10 vjet.
Këto masa do të merren pasi yjet e Premier League, Bukayo Saka, Jadon Sancho dhe Marcus Rashford u përballën me kërcënime në internet dhe abuzime raciste, për shkak se të tre ata humbën penalltitë e tyre në ndeshjen finale të Euro 2020 kundër Italisë në korrik.
“Këtë verë ne pamë futbollin të dëmtuar nga racizmi i turpshëm nga ofenduesit në internet, të cilët fshiheshin pas tastierës së tyre dhe abuzonin me futbollistët tanë. Ata që janë përgjegjës për abuzimet e tmerrshme raciste në internet duhet të ndëshkohen. Ndryshimet në ligjin që po shpall do të sigurojnë që ata të ndalohen të ndjekin ndeshjet e futbollit.”-deklaroi Priti Patel.
Rastet e futbollistëve që janë përballur me abuzimet raciste në mediat sociale janë shtuar shumë gjatë viteve të fundit, ndërsa klubet e Premier League vendosën të bojkotojnë platformat gjatë një fundjave sezonin e kaluar për të detyruar qeverinë e Mbretërisë së Bashkuar të vendosë masa më të ashpra dhe këto masa kanë ardhur tashmë./K.T/Gijoitna.com
Discussion about this post