Pas përplasjes në emisionin “Opinion”, ku mes tjerash pati dhe ofendime, ka qenë deputeti i Partisë Demokratike, Agron Shehaj i cili ka kërkuar ndjesë i pari ndaj pedagogut Mark Marku për debatin e zhvilluar mes tyre.
“Më fal! Se dua ta them. Dua të sqaroj diçka. Pata një konflikt me Mark Markun edhe gjatë reklamës dhe dua, e përjetova keq që jam mashtrues, matrapaz. Më fal! Të kërkoj ndjesë për reagimin. Është e drejta e tij të mendoj kështu. Unë kam respekt për profesorët. Në Shqipëria ka qindra mijëra sipërmarrës që ndihmojnë familjet e tyre”, ka thënë ai.
Ndërsa Marku i është përgjigjur se nuk ndryshon mendim nga qëndrimi i tij së krerët e partive nuk duhet të jenë biznesmenë.
“Ja ta sqaroj. Më pëlqen kjo po bën ti. Edhe unë të kërkoj ndjesë. Mos e kthe mirësjelljen në poshtërsi. Unë nuk thashë që jam kundër që biznesmenët të marrin pjesë në jetën politike. Por një kryetar i partisë s’duhet të jetë biznesmen. Pikë! Kjo është bindje”, është shprehur ish-deputeti.
Theksojmë se gjatë debatit në lidhje me përplasjen brenda PD, Marku u shpreh se doli që në Kuvendin Kombëtar për rithemelimin e PD dhe Berisha nuk tha asgjë, pasi ishte aty. Ndërkohë që tani kërkohet Kuvend Kombëtar për shkak se Berisha ka një problem të vetin personal.
Marku iu drejtua Shehajt duke i thënë se të gjithë mbajtën qëndrim kundër tij, madje dhe Shehaj pasi ai u nga salla, si dhe se nuk guxoi kurrë të ishte një kundërshtar i Bashës. Kjo gjë ka sjell zemërimin e Shehajt, duke iu kthyer Markut me fjalët leksione trimërie dhe guximi nuk më jep dot. Kaq deshi që të fillonte përplasje dhe në ofendime mes njëri-tjetrit.
