Kompania “ED KONSTRUKSION” SHPK, pronë e vëllezërve Alfred dhe Eduart Ibrahimi po hyn në listën e të preferuarave të bashkive socialiste. Ndërkohë duke fituar kontrata thuajse pa garë, vëllezërit janë shënjuar me “flamuj të kuq” të ngulur në çdo tender. Kjo firmë fiton gjithmonë me ofertat më të shtrenjta në punët publike të bashkive. Ky fakt pasqyrohet në kontratën e fundit që është lidhur me kryebashkiakun e Himarës, Jorgo Goro.
Tenderi është publikuar në buletinin e datës 27 mars 2023 në APP , ku bien menjëherë në sy shkeljet që janë bërë. Së pari, Goro do të hedhë 166 milionë lekë me objektin “Rikonstruksion i rrugës panoramike Pilur”. Por nga ofertat më poshtë do të shohim se kjo punë mund të bëhet edhe me më pak shpenzime.
Në fakt, vëmendja e Goros nuk është tek rruga, por tek milionat që mund të përvetësojë përmes tenderit. Prandaj dhe ka gjetur bashkëpunëtorë të mirë për këtë aferë sikur është “ED KONSTRUKSION” SHPK.
Punimet në këtë rrugë pritet të zgjasin deri në shtator të këtij viti. Dhe gjatë kësaj kohe vëllezërve Ibrahimi do t’iu lëvrohen 166 milionë lekë për një shtresë asfalt e disa vija të bardha që do të bëjnë në këtë rrugë.
Kompania fituese ka paraqitur ofertën me vlerë rreth 135 milionë lekë, fakt ky që tregon se Goro po planifikon para me tepricë. Gjithsesi nga shqyrtimi i ofertave të tjera, konstatojmë se oferta e “ED KONSTRUKSION” është më e shtrenjtë, pasi ka edhe oferta me vlerë 126 milionë lekë, 130 milionë lekë si dhe 114 milionë lekë. Pra me një diferencë 52 milionë lekë nga fondi limit dhe 21 milionë lekë diferencë nga oferta fituese. Me këto lekë, ndoshta mund të rikonstruktohej edhe një rrugë tjetër në Himarë, me po të njëjtën gjatësi.
Kush është fituesi?
Po, Jorgo Goro nuk i merr parasysh rregullat, kur bëhet fjala për vëllezërit Ibrahimi, të cilëve në kohën e “Rilindjes” përfitimi i tenderëve iu ka ecur më mbarë. “ED KONSTRUKSION” SHPK është një kompani tipike që vepron në këtë mënyrë duke fituar tenderë pa garë me çmime mbi 95% të fondit limit.
Sipas të dhënave nga Open Data Albania, kompania në fjalë merr tenderë kryesisht nga bashkitë për ndërtim rrugësh, ujësjellësish apo shkollash. Me fokus në bashkinë e Tiranës dhe atë të Sarandë. Ndërkohë që ka marrë edhe shumë tenderë në bashki të tjera, siç janë Lezha, Kavaja, Patosi, Dimali, Kuçova, etj.
Ajo që vlen të theksohet është fakti se shumicën dërrmuese të xhiros, rreth 86%, kompania e ka realizuar pikërisht prej kontratave publike. Sipas analizës së të dhënave edhe nga Open Data Albania, nga 40 procedurat që ka fituar e vetme, 10 prej tyre me vlerë kontrate rreth 2.8 milionë Euro rezultojnë me “Flamur të kuq” (me shkelje). Por sa të jenë kryebashkiakët e “Rilindjes” vëllezërit nuk i ndal asgjë, as frika nga SPAK-u!
Lexo edhe: Tenderi i pemëve, Jorgo Goro paguan 50 MLN lekë ofertën më të lartë
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post