Portieri italian Gianluigi Buffon është një nga legjendat e historisë së futbollit, pasi ka bërë një karrierë të madhe në fushat e Italisë dhe Europës për 25 vjet.
Ndonëse ka mbushur 45 vjeç, ai vazhdon që të luajë në nivele të larta dhe ka dhënë një kontribut të rëndësishëm te Parma në vitet e fundit. Madje, së fundmi ai ka marrë një propozim të frikshëm nga një ekip i Arabisë Saudite për një kontratë 2-vjeçare me pagë totale prej 30 milionë eurosh.
Por duket se kampioni i Botës në vitin 2006 po mendon të “varë” dorezat në gozhdë.
“Gigi” numëron 975 paraqitje në 25 vite që luan futboll. Ai e filloi karrierën e tij me Parmën me të cilën ka fituar një Kupë UEFA në sezonin 1998-99 dhe një Kupë të Italisë në të njëjtin vit.
Nga atje ai u transferua te Juventusi, në një periudhë merkatoje kur dukej shumë pranë Barcelonës. Me “Zonjën e Vjetër” luajti pjesën më të madhe të karrierës së tij.
Buffon ka veshur fanellën e “zonjës së vjetër” për 19 vite, duke fituar dhjetë kampionate, pesë kupa dhe gjashtë Superkupa të Italisë si dhe ka luajtur në tre finale të Champions League.
Në verën e vitit 2018 u transferua te Paris Saint-Germain, me të cilin festoi një kampionat, megjithatë, në Paris nuk ndjehej si në shtëpi duke u rikthyer te Juventusi, në vitin 2019.
Me torinezët, fitoi dhe një kampionat, në sezonin 2019-2020 (sezoni famëkeq i pandemisë). Pas dy vitësh në aventurën e dytë me Juven, ai firmosi me Parmën, me atë që ishte skuadra që e bëri të debutonte në futbollin elitar.
Discussion about this post