Futbollisti shqiptar i Çelsit, Armando Broja nuk shihet më vetëm si një lojtar premtuarës por si një futbollist i cili mund të bëhet një emër i njohur në një kampionat shumë të fortë siç është Premier Liga. Kjo shihet qartësisht nga fakti se ai është kthyer në një nga emrat më të lakuar në merkato me oferta të rëndësishme që kanë mbërritur për të në zyrat e klubit të Çelsit.
Një situatë e cila ka ndryshuar edhe mënyrën se si vetë klubi londinez po trajton sulmuesin e Kombëtares. E përditshmja londineze “Evening Standard” ka bërë të ditur se pronari i ri i Çelsit, Tod Bohli, ka planifikuar këtë javë një takim me sulmuesin shqiptar.
Trajneri Tomas Tuihel ka bërë të qartë se nuk do të japë një vendim për futbollistin nëse do e lejojë të largohet apo jo pa e parë nga afër në fazën përgatitore, ndërsa pronari i ri i klubit dëshiron që të shohë edhe ai nga afër futbollistin dhe të mësojë më shumë rreth tij duke komunikuar direkt me të dhe përfaqësuesit e 20-vjeçarit.
Një trajtim që Bohli e ka rezervuar deri tani për emrat më të njohur të skuadrës, të cilët i ka takuar personalisht, apo ka kërkuar që të ketë një bisedë me përfaqësuesit e tyre. Një situatë që tregon tashmë se Broja po trajtohet ndryshe dhe me shumë kujdes nga klubi londinez i cili nuk dëshiron të bëjë një gabim duke larguar një futbollist nga i cili mund të përfitojë më shumë në aspektin sportiv sesa në atë financiar.
Discussion about this post