Asambleja e Përgjithshme e Kombeve të Bashkuara miratoi rezolutën që i bën thirrje Rusisë t’i japë fund armiqësive në Ukrainë dhe të tërheqë forcat e saj.
Dokumenti , dërgon një mesazh të fuqishëm në përvjetorin e parë të nisjes së pushtimit rus të Ukrainës, duke kërkuar që Moska t’i japë fund agresionit.
Rezoluta, që është përpiluar nga Ukraina në konsultim me aleatët e saj, kaloi me 141 vota për, shtatë kundër dhe 32 abstenime. Presidenti ukrainas Volodymyr Zelenskiy përshëndeti votimin. “Kjo rezolutë është një sinjal i fuqishëm i mbështetjes globale për Ukrainën,” tha ai në një postim në Twitter.
Ministri i Jashtëm ukrainas, Dmytro Kuleba, tha se miratimi i kësaj rezolute është dëshmi shtesë se jo vetëm Perëndimi e mbështet shtetin e tij.
“Mbështetja është shumë më e madhe, dhe vetëm do të vazhdojë të konsolidohet dhe të forcohet. “Ky votim sfidon argumentin se pjesa jugore e botës nuk qëndron në anën e Ukrainës, sepse shumë shtete që përfaqësojnë Amerikën Latine, Afrikën dhe Azinë votuan për rezolutën,” tha ai.
Aleati i Rusisë, Kina, abstenoi në votën e OKB-së. Shtatë shtetet që votuan kundër ishin Bjellorusia, Mali, Nikaragua, Rusia, Siria, Koreja e Veriut dhe Eritrea. Kjo rezolutë mori më pak vota sesa pesë rezolutat që jane miratuar nga Asambleja që kur Rusia nisi pushtimin e Ukrainës më 24 shkurt 2022.
Gjatë dy ditëve, minsitrat e Jashtëm dhe diplomatët nga 75 shtete të botës iu adresuan Asamblesë.
Shumica prej tyre shprehën mbështetjen per mbrojtjen e integritetiy territorial të Ukrainës, parimet bazike të Kartës së OKB-së që të gjitha shtetet që janë pjesë e kësaj organizate duhet t’i përmbahen.
Discussion about this post