Organizata e Kombeve të Bashkuara i ka kërkuar Shteteve të Bashkuara të vazhdojnë të pranojnë azilkërkues dhe t’u garantojnë atyre rrugë ligjore, pas deklaratave të Presidentit Donald Trump, i cili u zotua të pezullojë imigracionin nga vendet e “Botës së Tretë” pas një sulmi pranë Shtëpisë së Bardhë.
Qëndrimi i OKB-së vjen pasi një shtetas afgan, që ka hyrë në SHBA në vitin 2021 dhe që sipas hetuesve ka qenë informator i CIA-s, kreu një sulm me armë zjarri dy ditë më parë, duke lënë të vrarë një efektiv policie dhe duke plagosur rëndë një tjetër.
I pyetur për reagimin ndaj deklaratave të Trump, zëdhënësi i OKB-së për të drejtat e njeriut, Jeremy Lawrence, theksoi se azilkërkuesit duhet të trajtohen sipas standardeve ndërkombëtare.
“Ata kanë të drejtë për mbrojtje sipas ligjit ndërkombëtar dhe kjo duhet të ofrohet përmes procesit të zakonshëm,” deklaroi ai në Gjenevë.
Edhe zëdhënësja e Agjencisë së OKB-së për Refugjatët, Eugene Byun, nënvizoi se personat që kërkojnë strehim nuk duhet të pengohen të hyjnë në territorin amerikan.
“Kur njerëzit që kanë nevojë për mbrojtje mbërrijnë në SHBA, ata duhet të kenë qasje në procesin e rregullt të azilit,” tha ajo, duke shtuar se shumica dërrmuese e refugjatëve janë pjesë e ligjshme dhe kontribuese të komuniteteve ku strehohen.
Discussion about this post