Mjeshtri shqiptar i violinës Olen Cesari, është dekoruar nga presidenti i Italisë Sergio Mattarella me titullin Komandant i Urdhrit të Yllit të Italisë me motivacionin si një artist italo -shqiptar me vlera të rralla.
I konsideruar si një nga violinistët më të mëdhenj botërorë, si kompozitor eklektik dhe virtuoz në violinë dhe një artist i jashtëzakonshëm, interpretues absolut i tingullit dhe zotërues me vlera të rralla i instrumentit. Në motivacionin e kësaj dekorate shkruhet se Olen Cesari është një artist i përmasave botërore me talentin e tij, që beson fort se muzika është universale dhe sjell paqe, miqësi dhe vëllazërim mes popujve.
Dekorata u dorëzua artistit shqiptar nga ambasadori i Italisë në Tiranë Fabrizio Buçi në një ceremoni ku ishin të pranishëm personalitete të vendit, artistë të shquar dhe diplomatë. Olen Cesari ka lindur në vitin 1975 në Durrës, Shqipëri. Ai lindi në një familje artistësh, duke pasur nënën instrumentiste dhe mësuese violine.
Sot ai është një nga instrumentistët më të mirë botëror. Që në moshën 5-vjeçare u cilësua si fëmija gjeni në violinë. Nëna e tij edhe mësuese violine për të ka qenë shumë rigoroze dhe e ushtroi violinistin e vogël që të jepte koncert virtuoze që në moshën 7-vjeçare ku ka dhënë koncertin e tij të parë recital në teatrin “Aleksandër Moisiu”. Më pas shteti shqiptar e dërgoi në Romë të vazhdonte studimet për violinën dhe në moshën 18-vjeçare Ilone Cesari kishte mbaruar 3 konservatore: një në Shqipëri, një në Itali, dhe një në Austri.
Olen Cesari është edhe një moderator dhe improvizues i shkëlqyer koncertesh. Ishte ai që e mbylli ceremoninë e dekorimit me interpretime të bukura së bashku me artistët Inva Mula, Mirush Kabashi, Marsel Cibukaj, etj, duke e bërë kulmin e koncertit të improvizuar aq bukur, edhe ambasadorin italian Fabrizio Buçi që të këndojë.
