Bashkia Himarë ka shpallur fituesit për pastrimin e qytetit dhe zonave Horë- Vranisht dhe Lukovë, kontrata publike prej miliona eurosh të cilat janë marrë nga kompanitë “Fusha” shpk, “ALKO-IMPEX General Construction” & “ALKO IMPEX CONSTRUCTION” shpk, kompania “Rej” shpk dhe “Pastrime Silvio”& “A.E.K & Co” shpk.
Këto janë të njëjtat kompani që kanë përfituar miliona euro për pastrimin e kryeqytetit dhe bashkive kryesore në vend, shpeshherë pa garë ose duke u eleminuar konkurrentët nga gara prej bashkive. Rasti i bregdetit shqiptar nuk ndryshon shumë nga rastet e tjera, madje këtu shifrat janë stratosferike sepse kompanitë janë shpallur fituese për lotin I dhe lotin II pa patur konkurrentë.
Vetëm në lotin II janë skualifikuar bashkimi i operatorëve “LEKA – 2007” shpk & “ALPEN PULITO” shpk duke u hapur rrugën të njëjtave kompani si në lotin I me numër REF-20780-02-28-2022.
Në lotin I kompanitë lider në fitimin e kontratave të plehrave “ALKO-IMPEX General Construcion” & “ALKO IMPEX CONSTRUCTION” shpk është skualifikuar në fillim por pasi ka bërë ankesë është futur në garë nga Komisioni i Prokurimeve Publike. Për këtë kontratë fondi limit është 1,4 milion euro dhe të tre kompanitë janë shpallur fituese me 99% të vlerës së këtij fondi.
Bashkimi i këtyre kompanive paraqet një emër jo të panjohur për qeverinë dhe bashkitë, pasi administrator dhe pronar i tyre është Arbër Abazi, nipi i ish-deputetit socialist Sadri Abazi duke përfituar miliona euro për pastrimin e kryeqytetit dhe bashkive kryesore në vend ku një pjesë e kontratave publike janë zhvilluar pa garë. Tenderat pa garë përjashtojnë konkurrencën duke rritur dyshimet për korrupsion dhe klientelizëm në kurriz të fondeve publike. Nga viti 2014 e në vazhdim “ALKO-IMPEX General Construction” shpk ka marrë fonde publike me vlerë 35 milionë dollarë sipas transaksioneve.
Kompania “Fusha” shpk në pronësi të Shkëlqim Fushës ka marrë fonde publike me vlerë 134 milion dollarë sipas nga transaksionet e kryera me pushtetin qendror dhe lokal sipas drejtorisë së Degës së Thesarit nga viti 2014 e në vazhdim.
Kjo kompani ka njohur rritje galopante ekonomike me ardhjen në pushtet të Partisë Socialiste por numri i lartë i tenderave është shoqëruar me procedura prokurimi të parregullta sipas Open Data Albania. Vetëm 31 milionë euro janë marrë nga “Fusha” shpk pa garë duke rritur dyshimet për korrupsion dhe klientelizëm për një nga firmat më të fuqishme në vend e cila ka zaptuar shëtitoret e jugut të Shqipërisë larg vëmendjes së medias dhe opinionit publik.
Kompania “REJ” shpk është një tjetër kompani e cila ka marrë tendera pastrimi në bashkitë e vendit dhe ajo që bie në sy është fakti se ka marrë 2,9 milionë euro me tendera të cilët janë klasifikuar me flamur të kuq nga Open Data sepse paraqesin risk për korrupsion dhe sjellje klienteliste. Kjo firmë ka marrë 14,6 milionë dollarë transaksione nga Dega e Thesarit nga viti 2015 e në vazhdim.
“Pastrime Silvio” shpk në pronësi të Bule Allmuça dhe Gëzim Salillarit është një tjetër komani e cila është pjesë e tortës me paratë publike që shpërndan bashkia e Himarës e cila është shpallur fituese te loti II si bashkim operatorësh me kompaninë “A.E.K & Co” shpk. Edhe kjo një tjetër kompani e cila është shfaqur shpeshherë si bashkim operatorë me kompano të tjera duke fituar tendera pa garë.
Sipas raportit të KLSH-së për Tiranën, kompanitë “Fusha” shpk, “ALKO-IMPEX General Construcion” & “ALKO IMPEX CONSTRUCTION” shpk nuk ishin efektive në grumbullimin dhe ndarjen e plehrave. Kriza e menaxhimit të mbetjeve urbane që zuri gjithë bregdetin shqiptar vitin e kaluar tregon se kriza e plehrave nuk është mungesë fondesh por metoda e përzgjedhjes së kompanive.
Në një kohë që bregdeti gjendet përballë fluksit turistik, tenderat pa garë ose me ankesa krijojnë dyshime për pastrimin e mbeturinave kur firmat janë po ato të cilat kanë dështuar në pastrimin e bashkive kryesore në vend.
Discussion about this post