“Olsi trafikant i Xibrakës”, Edi Rama refuzon interpelancën në Kuvend

Kryeministri Edi Rama ka reaguar për herë të parë lidhur me akuzat e opozitës për të vëllain Olsin, se është i lidhur ngushtë me fabrikën e kokainës të zbuluar në Xibrakë të Elbasanit.

Në një postim në rrjetin sociale “X”, Rama i etiketon akuzat “fabrikime” dhe “fantazi”, ndërsa refuzon dhe kërkesën e Gazment Bardhit për interpelancë në Kuvend lidhur me çështjen.

Rama thotë se Bardhi duhet të presë fjalën e SPAK, ndërsa shton se “nuk jemi përpara asnjë urgjence të posaçme”.

Rregullorja e Kuvendit thotë shprehimisht se, citoj, “interpelanca është kërkesa me shkrim, që i drejtohet kryeministrit, zv.kryeministrit ose çdo anëtari tjetër të kabinetit qeveritar mbi motivet, synimet, qendrimet e Këshillit të Ministrave, lidhur me aspekte te rendesishme te…

— Edi Rama (@ediramaal) April 3, 2024

Javën e kaluar, Bardhin denoncoi nga selia blu se Olsi Rama është trafikant i dosjes së kokainës “Xibraka”, por i ka shpëtuar drejtësisë për shkak të favorizimit nga policia dhe prokuroria e kohës.

Ai zbuloi dokumente të sistemit TIMS, që siç u shpreh, tregojnë se Olsi Rama dhe drejtuesit e grupit kriminal të kokainës kanë përdorur të njëjtin automjet, gjatë periudhës Prill – Dhjetor 2014. Bardhi tha se një procedim penal i ri nisi si derivat i dosjes së Xibrakës që kishte në qendër një person të pa identifikuar “i moshës 45 vjeç me flokë të shkurta” i cili sipas hetuesve, dyshohej se ishte pjesëtar i grupit që u godit nga autoritetet vendase pas sinjalizimeve nga homologët gjermanë. Ky person, deklaroi demokrati, është pikërisht Olsi Rama.

Të njëjta akuza hodhi në një emision televiziv gjatë mbrëmjes, ndërsa një ditë më pas dorëzoi dokumentet e publikuara në SPAK. Prokurorisë së Posaçme i kërkoi të nisë hetimet për vëllain e kryeministrit, si dhe të verifikojë veprimet e prokurorëve të dosjes dhe policisë së kohës.