Ministrja e Jashtme, Olta Xhaçka, ka bërë një deklaratë të rëndësishme në tryezën e diskutimeve pas çeljes formale të negociatave me Bashkimin Europian. Ministrja ishte e para që foli nga delegacioni shqiptar dhe gjatë fjalës së saj ajo tha se ky vendim është një motiv mjaft i madh për Shqipërinë. Ajo theksoi në fjalën e saj se mbetet ende shumë punë për të bërë nga ana e Shqipërisë për të shkuar te integrimi, por bëri të ditur se qeveria e ka gati planin e zbatimit për të arritur integrimin.
“Jam shumë e lumtur që jam këtu dhe dua të rrëfej se ndihem e lehtësuar dhe besoj se këtu flas në emër të shumicës dërrmuese të shqiptarëve pasi kemi pasur dyshime nëse kjo ditë do të vijë ndonjëherë. Ky durim strategjik është i drejtë. Vlerësoj faktin se Komisioni ashtu si ne ndien nevojën urgjente për të kompensuar kohën e humbur. Kemi punuar shumë për të hapur negociatat e anëtarësimit. Ky mbetet një objektiv që gëzon mbështetjen masive nga vendi ynë. Ka qenë forca shtytëse dhe motivimi për ndryshimet e Shqipërisë në 3 dekada.
Ky proces nuk ka lënë gur pa lëvizur, duke ndikuar në çdo sferë të jetës në Shqipëri. Sa i përket përmbajtjes së procesit të shqyrtimit do ta kap shkurt. Me komisioni kemi zhvilluar një sërë takimesh shpjeguese dhe rezultati ka qenë shumë i dobishëm për të çelur negociatat. Së pari për planin tonë të transpozimit ne e kemi tani planin kombëtar për integrimin europian. Për përpjekjet tona për të forcuar kapacitetet administrative do të angazhojmë të gjitha strukturat për negociatat tona të anëtarësimit. Ne jemi gati dhe kemi punuar shumë për këtë proces”, tha Xhaçka.
Sipas Xhaçkës, Shqipëria është gati për t’u ulur në tryezat e ardhshme dhe për t’i dhënë stimul kalimit të kapitujve.
Discussion about this post