Në këtë sezon vere, kur qytetarëve të Sarandës iu shkojnë shumë shpenzime për naftën e automjeteve, shtuar nga trafiku dhe rrëmuja, atyre iu duhet të paguajnë shtrenjtë edhe për naftën e bashkisë. Kryebashkiaku Oltion Çaçi ka njoftuar tenderin me objekt ‘Blerje karburant Aparati, Bordi, PMNZSH’, me fond limit 66 milionë lekë.
Gara është mbajtur hapur vetëm 10 ditë dhe bashkimi i operatorëve BOE “2A2F – L OIL” SHPK & “A&T” SHPK kanë qenë të vetmi që kanë dorëzuar një ofertë. Në fakt nuk mund ta quajmë bashkim, për shkak se të dyja firmat kanë të njëjtin pronar Fabian Goçin, partnerin e deputetes së PD-së, Ina Zhupa.
Tenderat që ai merr shpesh si dhuratë nga Rilindja për shkak të lojës politike të bashkëshortes, janë treguesi më i mirë se kur vjen fjala tek aferat, opozita dhe mazhoranca bëhen bashkë.
Tashmë e kemi theksuar shpesh se kur nuk ka dy ose më shumë oferta të përshtatshme, tenderi duhet të anulohet, pasi këtë kërkon ligji dhe e mira e arkës së bashkisë, që të kursehet fondi limit.
Ky rregull zbatohet gjithnjë e më rrallë. Prandaj shohim që edhe kryetari Çaçi ka vazhduar planin e tij. Pa garë fare, kryebashkiaku ka firmosur më datë 4 korrik 2024 kontratën me Fabian Goçin, i cili kishte një propozim me vlerë 66 milionë lekë, pra sa 100% e fondit limit.
Kemi mungesë konkurrence, ofertë sa fondi limit, çka të jep arsyen pse fituesi ka qenë i paracaktuar dhe madje tenderi është hartuar sipas dëshirës të tij.
Prandaj, Open Data Albania i ka vendosur prokurimit një “Flamur të kuq” për riskun e korrupsionit.
Kujtojmë se me ndarjen e buxhetit 2024, nga fondet në dispozicion 73 milionë lekë bashkia Sarandë i akordoi për karburant për mjetet e transportit në pronësi të bashkisë ne funksion aparatit te bashkisë, bordit te kullimit, të njësisë se zjarrfikëseve shpenzimet për mirëmbajtjen e tyre.
“Shpenzime transporti janë parashikuar ne shumen 7,300 mijë lekë. Në këtë zë shpenzimesh përfshihen shpenzimet për karburant për mjetet e transportit në pronësi të bashkisë ne funksion aparatit te bashkisë, bordit te kullimit, të njësisë se zjarrfikëseve shpenzimet për mirëmbajtjen e tyre, shpenzimet për marrje me qira te mjeteve te natyrave specifike ne dispozicion te qytetareve ne raste festash kombëtare dhe lokale, si edhe shpenzimet për dokumentacionin ligjor te mjeteve. Ne këtë shume janë parashikuar edhe shpenzimet për udhëtim dhe dieta te punonjësve qe autorizohen për shërbime pune jashtë qyteti”, theksohet në plan buxhetin e bashkisë.
Pra, janë vënë shumë para në dispozicion dhe kryebashkiaku po i harxhon përmes tenderave me shkelje, ku shohim se rrugët u bashkohen edhe me Fabian Goçin.
Në mars të këtij viti, bashkia Sarandë i dhuroi Goçit tenderin 42 milionë lekë për të blerë naftë për Ndërmarrjen e Shërbimeve Publike Sarandë. Edhe ajo kontratë mbante “Flamurin e Kuq”.
Ndërsa në fund të vitit 2023, Goçi përfitoi 27 milionë lekë nga Bashkia Sarandë përmes tenderit me objekt ‘Blerje karburanti për nevoja të Shoqërisë Rajonale UK Sarandë’, ku gjithashtu ka aksione bashkia.
Nga këto lëvizje, duket qartë që fondi 73 milionë lekë është destinuar të shkojë tek Goçi, ndërsa tenderat e stafit të kryetarit Çaçi janë fiktivë dhe rëndojnë peshën tek taksapaguesit e këtij qyteti.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post