Çdo vit përsëritet një tender për “riveshje dhe asfaltim”, por rrugët e Sarandës mbeten të degraduara, sepse bashkia mirëmban vetëm segmentet e qendrës së qytetit. Nuk e dimë se çfarë pune do të bëhet realisht me këto lekë, por për momentin mund të mësojmë se kush po përfiton. Kryebashkiaku i Sarandës,Oltion Çaçi ,ka shpallur së fundmi një prokurim me numër reference REF-98996-03-20-2024 dhe objekt ‘Riveshje e pjesëve te dëmtuara te shtresave asfaltike ne rrugët e Sarandës’.
Projekti afron arnime me asfalt në disa rrugica në afërsi të shëtitores dhe bregut të detit, një pjesë e të cilave janë me pllaka guri.
Ndërsa më thellë qytetit bashkia do të kujtohet kur të vijë fushata elektorale.
Në përgjithësi, për mirëmbajtjen dhe garancinë e rrugëve duhet të kujdesen ato firma që janë nënkontraktuar për ndërtim dhe rikonstruksionin e tyre. Në këtë rast bashkia po sjell një makinë me asfalto-beton për të mbushur gropat e korrupsionit, sepse kjo zonë është rindërtuar vetëm pak kohë më parë.
Kur në këtë listë futet ndonjë rrugë që është ndërtuar në vite e fundit, kemi të bëjmë me një abuzim të shtuar. Pasi rrugët supozohet të ndërtohen me materiale të mira dhe firmat të mbajnë përgjegjësi.
Shohim që për arnime të rrugëve do të shpenzohen 72 milionë lekë nga taksat e sarandiotëve. Kjo punë do të kryhet për 10 ditë, sipas afatit të vendosur nga bashkia.
Për më tepër këto para janë dorëzuar pa garë fare në arkën e firmës ARTI SHPK, në pronësi të Arqilea Papuçit dhe Mihal Xoros . Sipas dokumenteve të tenderit, në procedurë janë paraqitur 3 firma të tjera me ofertat e tyre.
Njëra prej tyre, ”SARK ”SHPK kishte edhe ofertën më të lirë me vlerë 66 milionë lekë, por Çaçi e ka skualifikuar që në fazën e parë sëbashku me dy kompanitë e tjera. Pasi kryetari eliminoi konkurrencën, firma ARTI SHPK përfitoi kontratën dhe më datë 8 prill 2024 kanë nënshkruar letrat.
Që në fillim të artikullit ne kemi renditur shkeljet që janë bërë më ketë tender, për të cilat Open Data Albania i ka vendosur ‘Flamurin e Kuq’. Këto janë sinjale të qarta për institucionet kontrolluese që të marrin masa, sepse ka risk korrupsioni.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post