“Bota është në një ‘garë me kohën’ pas përhapjes së variantit Omicron”, tha presidentja e Komisionit Europian Ursula von der Leyen të dielën. Ndërsa identifikohen më shumë raste dhe qeveritë në mbarë botën po mobilizohen për t’iu përgjigjur Omicron, një takim urgjent i ministrave të shëndetësisë të G7 do të mblidhet të hënën, shkruan CNN.
Omicron u identifikua për herë të parë nga shkencëtarët në Afrikën e Jugut, të cilët ngritën alarmin për numrin jashtëzakonisht të lartë të mutacioneve. Që atëherë, të paktën një duzinë vende të tjera kanë konfirmuar raste të variantit të ri. Përveç Afrikës së Jugut, varianti është zbuluar në Botsvana, Belgjikë, Kanada, Australi, Holandë, Danimarkë, Mbretërinë e Bashkuar, Gjermani, Izrael, Itali, Republikën Çeke, Hong Kong, se fundmi dhe në Japoni.
Të dielën, autoritetet holandeze njoftuan se të paktën 13 persona kishin rezultuar pozitivë në aeroportin e Amsterdamit Schipol pasi udhëtuan nga Afrika e Jugut. Zyrtarët kanadezë shëndetësorë konfirmuan gjithashtu dy rastet e para të variantit Omicron në Otava të dielën.
Një numër vendesh kanë mbyllur kufijtë e tyre për udhëtarët nga Afrika e Jugut, me Bashkimin Europian, Japoninë, Australinë, Shtetet e Bashkuara, Kanadanë, Ruandën dhe shumë të tjerë që kanë pezulluar udhëtimet nga vendet si Afrika e Jugut, Botsvana, Zimbabve, Namibia, Lesoto, Mozambiku dhe Malavi.
Discussion about this post