Në një njoftim në faqen zyrtare të Bashkimit Europian, ONM-ja thekson se zgjatimi i mandatit duhet të bëhet nga autoritetet shqiptare, por gjithmonë në konsultim me Komisionin e Venecias. Operacioni Ndërkombëtar i Monitorimit ka mbështetur propozimin e mazhorancën për zgjatjen e mandatit kushtetues për trupën e KPK-së për vijimin e procesit të Vettingut.
“Në përputhje me mandatin e monitorimit që i është dhënë ONM-së nga Kushtetuta e Shqipërisë, ONM konsideron se është me rëndësi parësore që të përfundojnë të gjitha rastet e verifikimit në pritje në periudhën më të shkurtër të mundshme kohore, duke ruajtur konsistencën dhe integritetin e procesit. Për të arritur këtë rezultat, është e nevojshme një zgjatje e kufizuar në kohë e mandatit kushtetues të anëtarëve të Komisionit të Pavarur të Kualifikimit dhe të Institucionit të Komisionerëve Publikë. Kjo do t’i lejojë dy organet të përfundojnë të gjitha rastet në të cilat ka filluar hetimi. Është në kompetencën e autoriteteve shqiptare të përcaktojnë afatet e sakta të një shtrirjeje të tillë, në konsultim të ngushtë me aktorët përkatës, përfshirë Komisionin e Venecias,”- thuhet në reagimin e Operacionit Ndërkombëtar të Monitorimit.
Në Qershor të vitit të ardhshëm përfundon mandati i Komisionit të Pavarur të Kualifikimit si dhe i Komisionerëve publikë. Idea e shumicës është që mandati të zgjatet deri në përfundim të të gjithë procesit të rivlerësimit, pasi deri më tani nuk ka mbaruar puna as për gjysmën e magjistratëve.
Pak ditë më parë, në një intervistë për Zërin e Amerikës, ambasadorja amerikane Yuri Kim deklaroi se për këtë çështje, ku përfshihet dhe Operacioni Ndërkombëtar i Monitorimit, po shihen disa opsione. Nëse nuk bihet dakord për shtyrjen e mandatit atëherë rivlerësimi do të duhet të bëhet nga Këshilli i Lartë Gjyqësor për gjyqtarët dhe Këshilli i Lartë i Prokurorisë për prokurorët. Por për zgjatjen e mandatit duhet edhe dakordësimi nga opozita.
