Kryeministri Edi Rama gjatë fjalës së tij në kuadër të takimit për nismën “Ballkani i Hapur” prezantoi edhe Oliver Varhelyin, Komisionerin për zgjerimin në BE.
Ky i fundit, u shpreh se mbështet nismën “Open Balkan”, duke theksuar se e sheh atë si pasardhës të Procesit të Berlinit. Varhely deklaroi se tregu i përbashkët rajonal do të sjellë zhvillim ekonomik, teksa i kërkoi liderëve të tre vendeve që të vijojnë të nxisin këtë nismë.
“Kam qenë gjithmonë i pirur pozitivisht ndaj këtij propozimi. Së pari u quajt Minishengen e më pas u përpoqëm me Procesin e Berlinit, por për fat të keq kjo nismë u la mënjanë dhe ndërkohë e konsideroj ‘Ballkanin e Hapur’ një pasardhëse apo një zëvendëse deri sa të gjithë të jenë rreth tryezës. Ju duhet ët vazhdoni ta nxisni këtë nismë sepse rajoni kërkon të jetë një i tërë sa i takon ekonomisë, shoqërisë dhe rajoni kërkon të jetë bashkë, siç jemi ne në BE. Admiroj faktin se sa fort e ndjeni këtë nismë, ka qenë nismë që vjen nga Ballkani. Ju kuptuat rëndësinë e integrimit rajonal dhe kjo është në gjendje të ndryshojë jetën e qytetarëve tuaj. Ky është mesazhi më i mirë që rajoni mund të përçojë, që jo vetëm është gati për bashkëpunim rajonal, por po e bën. Mund të më përfshini si mbështetës të ‘Ballkanit të Hapur’. Ne mendojmë që në bazë të rregullave të BE, çdo bashkëpunim rajonal jo vetëm është i mirëpritur, por është në të mirë të të dyja palëve”, tha Varhelyi.
Edhe njëherë Varhelyi i kërkoi 3 vendeve që nuk i janë bashkuar kësaj nisme, Kosovës, Malit të Zi dhe Bosnje dhe Hercegovinës që t’i bashkohen sa më shpejt.
Discussion about this post