Kryeministri Edi Rama nga foltorja e Kuvendit teksa prezantoi programin e qeverisë, është ndalur edhe tek çështja e “Ballkanit të Hapur”. Rama tha se “Open Balkan” nuk është lojë e Serbisë, teksa nuk munguan kritikat ndaj qeverisë së Kosovës.
“Ballkani i hapur nuk është lojë e Serbisë. Nuk është devijim nga rruga e anëtarësimit të BE. Të gjitha këto janë përralla me gogol, në një luftë nga Facebook dhe kolltuku. Kosova dhe Shqipëria atë armik e kanë mundur realisht falë SHBA-së, kundër xhahilit të Beogradit si dhe falë UCK. Foshnjat që lindën në atë luftë nuk ia kanë borxh politikës që luan luftash me Serbinë as në Prishtinë as në Beograd. U takon atyre të marrin vendime dhe ne na takoj t’i respektojmë. Për Shqipërinë vendosin autoritetet e Shqipërisë dhe ata duhet t’i respektojnë vendimet tona. Nëse nuk na pëlqejnë ti diskutojmë vëllazërisht, por jo ti shpallim si tradhtarë dhe konsipracionistë ruso-kinezë ata që mendojnë ndryshe.
Rama e cilësoi edhe njëherë si “pjellë” të procesit të Berlinit, për të ecur më shpejt drejt katër lirive të BE.
“Ballkani i Hapur është pjellë e procesit të Berlinit për të ecur më shpejt me lirinë e lëvizjes së njerëzve pa pritur që të na mbledhin njëherë në vit për të bërë një mbledhje të radhës. Në procesin e Berlinit ishte edhe korridori blu. Ballkani i Hapur nuk merr përsipër asgjë, por mundëson që ta nxjerrim vetë gomarin nga balta,” tha Rama.
Nisma e “Open Balkan” është iniciuar nga kryeministri Edi Rama, presidenti serb Alexandër Vucic dhe kryeministri i Maqedonisë së Veriut, Zoran Zaev, ndërsa kryeministri Albin Kurti nuk ka pranuar që Kosova të jetë pjesë.
