Ditën e sotme është finalizuar me një dokument të nënshkruar, nisma “Open Balkan”. Liderët iniciues të kësaj nisme, kreu i qeverisë shqiptare, Edi Rama, Presidenti serb, Aleksandër Vuçiç dhe Kryeministri i Maqedonisë së Veriut, Zoran Zaev kanë nënshkruar një memorandum mirëkuptimi për bashkëpunim, që është publikuar e detajuar në Fletoren Zyrtare. Memorandumi parashikon forcimin e marrëdhënieve mes 3 shteteve, veçanërisht në fushën e importeve, eksporteve dhe lëvizjes së mallrave, me qëllim eliminimin e pengesave në tregtinë e ndërsjellë.
Marrëveshja parashikon që 3 shtetet të reduktojnë kontrollet, formalitetet dhe numrin e dokumenteve të kërkuara, duke nxitur reduktim të kostove dhe shpejtësi në procedurën e zhdoganimit. “Autoritetet doganore të palëve bashkëpunojnë në mënyrë që të sigurojnë kushtet për të thjeshtuar procedurën e tranzitit ndërmjet tyre, në masën më të gjerë të mundshme” – thuhet në marrëveshje, që nxit rritjen e qarkullimit të mallrave ushqimore dhe industriale.
Në paragrafin e parë theksohet se 3 nismëtarët, do të mbajnë të hapur ftesën për homologët e tyre të Kosovës, Malit të Zi dhe Bosnjës e Hercegovinës, që të bëhen pjesë të “Open Balkan”, për të përmirësuar jetën e të gjithë qytetarëve të rajonit, ndërsa memorandumi do të mbetet në fuqi për një kohë të pacaktuar.
Objektivat marrëveshjes janë:
1-Rritja dhe forcimi i bashkëpunimit ekonomik ndërmjet palëve.
2- Thjeshtimi i procedurave në lidhje me importet, eksportet dhe lëvizjen e mallrave.
3- Shkëmbimi i të dhënave ndërmjet autoriteteve të doganave dhe autoriteteve të tjera.
4- Promovimi, nëpërmjet zgjerimit të tregtisë së ndërsjellë, i zhvillimit harmoni të marrëdhënieve ekonomike ndërmjet palëve.
5-Eliminimi gradualisht i pengesave në tregtinë e mallrave.
Nisma “Open Balkan” është kritikuar dhe kundërshtuar jo pak nga opozita shqiptare dhe politika e Kosovës.
