Prokuroria e Posaçme do të dorëzojë sot kërkesën për vlerësimin e masës dhe marrjen në pyetje të zyrtarëve dhe biznesmenëve të arrestuar për shkelje të barazisë në tenderë në Bashkinë e Lushnjës dhe shpërdorim detyre.
Kjo dosje ka dokumentuar vetëm këtë rast abuzimi që lidhet me tenderin për rehabilitimin e një kanali vaditës në një fshat të Lushnjës dhe nuk ka raste të tjera që po verifikohen, të paktën deri tani.
Të ndaluarit do të merren në pyetje nga Prokuroria gjatë vlerësimit të masës së sigurisë, ndërsa burime thonë se në deklarimet paraprake kanë mohuar të kenë bashkëpunuar për favorizimim e kompanisë së Bujar Muratit. Kreu i Bashkisë mësohet të ketë mbajtur qëndrim mohues, megjithëse pritet që deklarimet dhe qëndrimet e tij për akuzën ti paraqese në seancë.
Fatos Tushe dhe 10 zyrtarë të Bashkisë dhe Ndërmarrjes së Pasurive Publike, u arrestuan pasi akuzohen se kanë kryer shkelje me tenderat. Një tender me vlerë 24 milionë lekë për kanalet ujitëse të qytetit është zbuluar deri më tani në media si shkaku i arrestimit, ndërsa dyshohet se ka patur edhe ndërhyrje të grupeve kriminale që kanë marrë tendera pastrimi në këtë bashki.
