Janë arrestuar ditën e sotme krerët e policisë shqiptare në pikën kufitare të Kosovës në Vërmicë. Burimet bëjnë me dije se policia kishte ngritur që më herët dyshime se këta drejtues po abuzonin me detyrën dhe kishte nisur kontrollet. Kështu ditën e sotme në kuadër të operacionit “Pika”, janë arrestuar të gjithë krerët shqiptarë të policisë në kufi. Kujtojmë se para një jave po nga ky operacion kanë rënë në pranga 50 efektivë policie nga Kosova dhe Shqipëria.
Sipas mediave në Kosovë sot priten të arrestohen rreth 20 efektivë policie të Kosovës dhe 40 të tjerë në radhët e policisë shqiptare. Ata dyshohen për veprat penale “marrje e ryshfetit” dhe “keqpërdorim i pozitës apo autoritetit zyrtar”. Hetimi përfshin edhe bashkëpunim me prokurorë nga SPAK (Struktura e Posaçme kundër korrupsionit dhe krimit të organizuar) dhe zyrtarët e AMP-së Agjencisë për Mbikëqyrje Policore në Shqipëri.
Operacionit të sotshëm, i koduar me emrin “Pika 2”, i ka paraprirë një hetim rreth një vjeçar me dyshimin për përfshirje në aktivitete të kundërligjshme të një numri të zyrtarëve policorë lidhur me veprat penale “marrje e ryshfetit” dhe “keqpërdorim i pozitës apo autoritetit zyrtar”. Ky hetim është duke u zhvilluar në koordinim të plotë dhe udhëheqjen nga Prokuroria Speciale të Republikës së Kosovës duke përfshirë edhe masa të fshehta të hetimit.
Discussion about this post