Një histori e jashtëzakonshme mbijetese ka ardhur nga Venezuela, ku një nënë dhe tre fëmijët e saj janë nxjerrë të gjallë nga rrënojat, 11 ditë pas tërmeteve shkatërruese që goditën vendin.
Operacioni i shpëtimit u zhvillua në zonën e La Guairas, një prej rajoneve më të prekura nga lëkundjet sizmike të 24 qershorit. Familja kishte mbetur e bllokuar nën rrënojat e një ndërtese banimi që nga momenti i shembjes.
Sipas autoriteteve, nëna arriti t’i mbante gjallë tre fëmijët e saj gjatë gjithë ditëve të izolimit, duke i ushqyer me gji dhe duke u kujdesur për ta në kushtet ekstreme nën rrënoja.
Pas kërkimeve intensive, ekipet e emergjencës arritën të lokalizonin familjen dhe ta nxirrnin të gjithë të gjallë, në një moment që është cilësuar si një mrekulli në mes të një prej katastrofave më të mëdha natyrore të vendit.
Ndërkohë, pasojat e tërmeteve vijojnë të jenë tragjike. Sipas bilancit zyrtar, 3 685 persona kanë humbur jetën dhe 16 740 të tjerë janë plagosur, ndërsa mijëra persona rezultojnë ende të zhdukur.
Tërmetet kanë shkaktuar dëme të mëdha materiale, duke shkatërruar ose dëmtuar rreth 60 mijë ndërtesa dhe duke lënë shumë familje pa strehë.
Autoritetet paralajmërojnë gjithashtu për rrezikun e përhapjes së sëmundjeve infektive për shkak të mungesës së ujit të pijshëm dhe kushteve të vështira higjieno-sanitare në zonat më të prekura.
Discussion about this post