Gjykata e Durrësit ka lënë të lirë dy doganierët e Portit që u arrestuan pak ditë më parë në kuadër të operacionit policor të koduar “Porosia”. Togat e zeza e konsideruan të paligjshëm arrestimin e tyre dhe të pronarit të fugonit ku u gjetën medikamente të ndryshme mjekësore.
Kështu dy doganierët, Enkel Shehi dhe Artan Topuzi, janë liruar këtë të hënë nga qelia. Gjithashtu edhe për pronarin e fugonit Behar Lleshi, është konsideruar i paligjshëm arrestimi. Për këta tre persona gjykata vendosi detyrim paraqitje.
Policia në njoftimin e saj për operacionin njoftonte pak dite me parë thanë se kanë ndaluar në lagjen nr.13, Durrës, një mjet fugon tip “Mercedes Benz”, me drejtues personin me inicialet G. K. dhe pronar Behar Lleshi. Gjatë kontrollit në këtë mjet janë gjetur dhe sekuestruar në cilësinë e provës materiale një sasi medikamentesh të ndryshme mjekësore, kamera sigurie dhe Rapid Test Antigen.
Në vijim të veprimeve hetimore, specialistët për Hetimin e Krimeve Ekonomike dhe Financiare arrestuan në flagrancë edhe Artan Topuzin, 58 vjeç dhe Enkel Shehi, 52 vjeç, me detyrë doganier, të dy banues në Durrës.
Personat në fjalë dyshohet se kanë shpërdoruar detyrën duke mos kryer kontrollin e imtësishëm të mjetit ku u gjetën mallrat kontrabandë.
