Autoritetet italiane kanë sekuestruar një vilë luksoze dhe mbi 100 mijë euro cash që i përkisnin Massimiliano Fiore, 47 vjeç, një ndër figurat kyçe të trafikimit ndërkombëtar të drogës mes Shqipërisë dhe Italisë.
Fiore u arrestua më 21 maj, si pjesë e operacionit të përbashkët antidrogë të koduar “Ura”, i zhvilluar në Itali, Shqipëri dhe Belgjikë. Ai akuzohet se ishte ndërmjetësi kryesor mes një klani kriminal palermitan nga lagjja Japigia dhe grupeve shqiptare, të cilat importonin dhe shpërndanin kokainë dhe heroinë në rajonin italian të Puglias.
Sipas Prokurorisë Antimafia të Barit, Fiore jo vetëm që organizonte trafikun e lëndëve narkotike, por edhe siguronte “mbrojtje mafioze” për palermitanët, duke i ndihmuar të vepronin të pandëshkuar në zonën e tyre.
Sekuestrimi i pasurive të Fiore është pjesë e një hetimi të thelluar financiar, që synon të godasë edhe përfitimet ekonomike të rrjeteve kriminale që veprojnë në trafik ndërkombëtar droge dhe pastrim parash.
Operacioni “Ura”, i koordinuar nga Drejtoritë Antimafia në Itali dhe autoritetet shqiptare, çoi në dhënien e masave paraprake ndaj 52 personave të përfshirë në aktivitete kriminale në Itali, Belgjikë dhe Shqipëri. Ata përballen me akuza të rënda për trafik droge, pastrim parash dhe shpërdorim detyre.
Në maj, në kuadër të të njëjtit operacion, autoritetet sekuestruan edhe asete të tjera me vlerë disa miliona euro në të tre vendet ku u zhvillua operacioni.
Hetimet janë ende në vijim dhe priten zhvillime të tjera në ditët në vijim, ndërsa autoritetet italiane dhe shqiptare po vijojnë bashkëpunimin e ngushtë në luftën kundër krimit të organizuar ndërkombëtar.
Discussion about this post