Presidentja e Kosovës Vjosa Osmani i është nënshtruar një operacioni. Mësohet se ajo ka hequr tëmthin dhe ndodhet në gjendje të mirë shëndetësore.
Lajmin e ka konfirmuar institucioni i Presidencës, ku ndër të tjera në njoftim thuhet se ndërhyrja u realizua dje. Kompetencat e presidentit i ka marrë ndërkohë kryetari i Kuvendit të Kosovës, Glauk Konjufca.
Njoftimi i Presidencës së Kosovës:
Zyra e Presidentes së Republikës së Kosovës njofton opinionin publik se dje (2 nëntor), pas rekomandimit nga mjekët specialistë, Presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses.
Bazuar në vlerësimin dhe vullnetin e saj, gjatë ditës së djeshme, Presidentja Osmani ka bërë bartjen e përkohshme të përgjegjësive të Presidentes së Republikës tek Kryetari i Kuvendit të Republikës së Kosovës, z. Glauk Konjufca.
Nga 3 nëntori, Presidentja do të vazhdoj me ushtrimin e detyrave dhe obligimeve kushtetuese që ndërlidhen me pozitën e Presidentes së Republikës, si dhe gradualisht do t’i kthehet angazhimeve publike.
Gjatë kësaj periudhe, kërkojmë mirëkuptimin e medieve për të respektuar të drejtën fundamental për privatësi të Presidentes, që është e garantuar me kushtetutë.
Discussion about this post