Policia e Vlorës ka finalizuar operacionin e koduar “Opium”. Në fshatin Drithas u zbulua një ambient i hapur ku ishin mbjellë 70 bimë të dyshuara opium. Në pranga ka rënë Tolem Lamaj 54 vjeç, i dyshuar si kultivuesi i bimëve narkotike opium.
Njoftimi i Policisë së Vlorës:
Në zbatim të planit operacional mbarëkombëtar, të hartuar nga Drejtoria e Përgjithshme e Policisë së Shtetit, për intensifikimin e kontrolleve, me shërbime të shtuara dhe logjistikë bashkëkohore, me qëllim parandalimim dhe goditjen e tentativave që në fazë fillestare të kultivimit të bimëve narkotike, shërbimet e Komisariatit të Policisë Vlorë, bazuar dhe në informacionet e marra falë bashkëpunimit me qytetarët, kanë organizuar dhe finalizuar operacionin policor të koduar “Opium”.
Gjatë këtij operacioni, në fshatin Drithas, në një ambient të hapur, në tokën e shtetasit Tolem Lamaj, u konstatuan të kultivuara 70 bimë të dyshuara narkotike opium, të cilat pas veprimeve procedurale dhe hetimore, u sekuestruan në cilësinë e provës materiale.
Në vijim të veprimeve procedurale, u bë arrestimi në flagrancë i shtetasit Tolem Lamaj, 54 vjeç, banues në fshatin Drithas, i dyshuar si kultivuesi i bimëve narkotike opium.
Discussion about this post