Erion Veliaj me përgjegjësinë e tij personale vendosi të heqë nga xhepi 6 milionë euro të qytetarëve të Tiranës, për t’ja dhënë inceneratorit që nuk ekziston dhe është nën sekuestro nga SPAK.
Akuza është bërë nga këshilltari i PL-së në Këshillin Bashkiak të Tiranës, Endrit Braimllari, pas mbledhjes së zhvilluar pasditen e sotme, e cila u shoqërua me debate mes kryebashkiakut Erion Veliaj dhe këshilltarëve të opozitës.
“Vendimmarrja e sotme e Këshillit Bashkiak vetëm me kartonat e rilindjes është e qartë. Veliaj me përgjegjësinë e tij personale vendos t’i heqë nga xhepi paratë qytetarëve të Tiranës, për t’ja çuar inceneratorit të Tiranës, i cili është i sekuestruar nga SPAK.
Këto para i duhen Veliajt për të mbushur xhepat. Është absurd sesi edhe nën sekuestro, Veliaj vendos t’i kalojë 6 milionë euro inceneratorit të Tiranës që nuk ekziston. Veliaj vendos të ndryshojë buxhetin për këtë skemë korruptive. Kjo skemë ka vetëm një përfitues që është Veliaj”, tha Braimllari.
Ndërkohë, kreu i këshilltarëve të opozitës, Ilir Alimehmeti, akuzoi Bashkinë e Tiranës se i dha 25 mijë metër tokë një kompanie anonime, pa bërë asnjë transparencë.
“Do i dhurohen 25 mijë metra tokë të Tiranës një qendre që nuk ka përfaqësues. Këto 25 mijë metra kuadër për sa kohë do të jepen, për një muaj, një vit, 10 vjet? Nuk ka asgjë.
Bashkia e Tiranës vendosi t’i japë këto metra kuadër një anonimi. Për këto gjëra duhet t’i përgjigjen njerëzve, ku çojnë paratë e qytetarëve dhe tokën e shqiptarëve”, tha Alimehmeti.
Discussion about this post