Ish-kryeministri bullgar dhe lider i partisë më të madhe opozitare në Sofje, Bojko Borisov në një intervistë për mediat është shprehur se nëse qeveria bullgare bën lëshime ndaj Maqedonisë së Veriut dhe i dorëzon në Parlament, opozita është e gatshme t’i mbështes.
“Nëse qeveria bullgare bën lëshime ndaj Maqedonisë së Veriut dhe i dorëzon në Parlament, ne jemi të gatshëm t’i mbështesim”, deklaroi Bojko Borisov.
Ai gjithashtu është pyetur nëse plani i propozuar nga kryeministri i ri bullgar, Kirill Petkov për formimin e grupit të punës për dialog do të funksiononte, Borisov theksoi se mundet “vetëm t’i dëshirojë sukses” dhe “nëse i duhet mbështetje, do t’ia japë”.
Sipas Borisovit, Shkupit i është thënë se i ka “dy-tri” tema që duhet të zgjidhen, pakicat, të ndryshojë Kushtetuta, të qartësohet historia dhe më pas të vazhdojë më tej.
“Bullgaria në asnjë rast nuk e ka ndaluar Maqedoninë e Veriut”, pohon Borisov, duke shtuar se “nuk është e mundur të hyhet në BE dhe të mbarten probleme me vete”, prandaj Sofja “vetëm i ka ngadalësuar” Shkupin dhe Tiranën.
Jo vetëm Shkupi, por edhe Tirana është me sytë nga Sofja, pasi vetoja e Bullgarisë për Maqedoninë ka bllokuar edhe Shqipërinë në rrugën drejt BE-së, pasi Brukseli kërkon që dy vendet të ecin së bashku drejt integrimit.
Discussion about this post