Sekretari i Përgjithshëm i Partisë Socialiste, Damian Gjiknuri në një prononcim për mediat është shprehur se shqiptarët do ta marrin vesh sot pas mbledhjes së Kryesisë emrin e kandidatit për Presidentin e ri të vendit.
“Një nga defektet që do ia vendosja në dukje opozitës, është që ishte e paaftë për të diskutuar emra. Për aq kohë sa jemi pjesë një forumi të lartë të PS, aty do të diskutohen të gjitha emrat. Mos u bëni të pa durueshëm, sot pasdite do të mësoni dhe emrin e kandidatit që do e bëj siç duhet rolin e Presidentit”, tha Gjiknuri.
Gjiknuri tha se janë marrë në konsideratë gjithë emrat dhe se grupi negociator do të marrë vendimin e duhur për zgjedhjen e presidentit të ardhshëm.
“Janë zhvilluar konsultime për profilin e duhur që i duhet vendit në këtë moment. Do të thotë që të gjitha emrat janë në konsideratë, por natyrshëm grupi negociator do të marrë vendim për propozimet përkatëse. Ne shpresojmë dhe jemi të bindur se do të kemi shumë shpejt një President të zgjedhur”, tha Gjiknuri.
Discussion about this post