Deputetët e Partisë Demokratike, kanë kërkuar të mbajnë një minutë heshtje për vrasjen e 14-vjeçarit Martin Cani nga një bashkëmoshatar i tij, por kërkesa është refuzuar nga kryeparlamentarja Elisa Spiropali.
Kërkesa u bë nga deputeti Asllan Dogjani, por Kryetarja e Kuvendit Elisa Spiropali refuzoi me argumentin se nuk ishin në sallë të gjithë deputetët.
Pavarësisht kësaj deputetët e PD janë ngritur më këmbë dhe kanë mbajtur një minutë heshtje.
Pjesë nga diskutimi:
Dogjani: I propozoj Kuvendit të mbajmë një minutë heshtje në respekt të prindërve të familjarëve, nxënësve, mësuesve dhe fëmijëve të Shqipërisë.
Spiropali: Kjo është një ngjarje tragjike, duket të bisedojmë dhe të vendoset në një kohë të përshtatshme.. Këtu nuk janë deputetët dhe do ishte mungesë respekti për viktimën dhe familjen e tij. Të mos e përdorim për politikë të ditës. Duhet të gjejmë një kohë kur të jenë të gjithë deputetët. I bëjmë thirrje deputetëve të jenë në sallë.
Noka: Këtu ka 24 orë që në të gjithë mediat pasqyrohet vrasja e një 14-vjeçari.
Ka 24 orë që i gjithë opinioni publik është i shokuar.
Dhe ju të gjithë që jeni atje, duke filluar të gjithë ministrat, që nga ky hajduti i bashkisë e duke përfunduar deri tek ajo që kishte burrin bandit dhe therte njerëzit, heshtni a thua se nuk ka ndodhur gjë në këtë vend.
Tani zonjë, kërkoi kolegu një minutë heshtje.
Është tragjike zonjë, sepse 24 orë më përpara në atë shkollë keni mbajtur leksion për sigurinë.
E gjithë drejtoria e shkollës ka pasur informacion për ngjarjen.
Edhe punonjësit e policisë që mbulojnë zonën kanë pasur informacion dhe askush nuk dashur t’ia dijë, sepse ju i bëni gjërat për shou.
Mbrëmë në mesnatë u vra një i ri, i biri i një gjyqtari që ka dhënë dënime me burgime të përjetshme për krimin.
I biri i një gjyqtari që ka dënuar dhjetëra kriminale dhe që ju, drejtësia juaj, e flaku në rrugë vetëm se nuk ishte lëpirës i juaji dhe i bandës që ju keni çuar në krye të drejtësisë.
Dhe këtu sikur nuk ndodh asgjë.
Pse ndodhin këto?
Sepse drejtori i përgjithshëm i policisë është ushtar i krimit.
Keni çuar drejtor të policisë së Tiranës një ushtar të krimit të organizuar.
Prandaj krimi bën kërdinë.
Nuk ka turp më të madh zonjë se deputetët të kërkojnë një minutë heshtje për vrasjen e një fëmije dhe ju këtu të rrini ulur.
Ju rrini mbi kufomat e njerëzve.
Ju rrini mbi gjakun e njerëzve në pushtet.
Kjo është fytyra juaj.
Discussion about this post