Pas çdo qëndrimi apo veprimi të deputetëve të opozitës ka një reagim nga mazhoranca e Kryeministrit Edi Rama dhe nga mbështetësit e Lulzim Bashës, të grupuar rreth PD së vulës.
E ndërsa socialistët e Ramës kanë shmangur reagimet dhe po përdorin Gardën si një mburojë për të penguar çdo veprim opozitar, mbështetësit e Bashës vijojnë të shprehin kritika ndaj opozitës së drejtuar nga Sali Berisha.
Rradhën për të reaguar pas përplasjeve të deputetëve të opozitës me gardistët e Ramës e kishte Kreshnik Çollaku.
Përmes një postimi në facebook, Çollaku shkruan se dhuna në Kuvend nuk përfaqëson opozitën që mund të përmbysë kryeministrin Rama.
Nënkryetari i PD nënvizon se një opozitë e tillë, destruktive, i jep mandatin e katërt kryeministrit Rama.
“Një opozitë që kacavirret nëpër dritaret e parlamentit, është fiks opozita që i duhet Edi Ramës.
Një opozitë që me kaq shpejtësi mbledh kaq refuzim qytetar rreth vetes, është fiks opozita që i duhet Edi Ramës.
Një opozite që për Kosoven bashkon voten me “argatin e Vuçiç”, por për karriget e ofiqet e veta përmbys parlamentin, është fiks opozita që i duhet Edi Ramës.
Një opozitë e tillë, nuk është opozita që përmbys Ramën.
Një opozitë e tillë i fal Ramës mandatin e katërt dhe ky nuk është krim vetëm ndaj demokratëve por dhe ndaj rithemelisave dhe më gjerë akoma, një krim ndaj Shqipërisë.
Ndaleni këtë marrëzi, përfituesi i vetëm i dhunës në parlament është Edi Rama.
Humbesi i vetëm prej dhunës në parlament është opozitarizmi”, shkruan Çollaku.
Discussion about this post