Ndërsa deputetët e opozitës janë angazhuar në atë që e quajnë si aksionin opozitar në Parlament, duke bllokuar zhvillimin e seancave dhe komisioneve parlamentare, kolegët e tyre socialistë, festojnë me bakllava.
Një video e postuar në rrjetet sociale tregon një grup deputetësh të PS-së që në një nga lokalet pranë Kryesisë së Kuvendit, janë mbledhur dhe ushqehen me bakllava.
Mes byrekëve që iu sugjeroi deputeti Flamur Noka, që mund të gjenin në zyrën e Lulzim Bashës, socialistët kanë zgjedhur bakllabanë, që ua ka sjellë Antoneta Dhima, një tjetër deputete e PS-së.
“Bakllava nga Fieri me rastin e fillimit të diskutimeve për projekt-buxhetin e vitit 2024 dhe paketës fiskale, duke uruar që të gjithë kolegët e opozitës të reflektojnë e të kuptojnë që mikpritja shqiptare nis nga ëmbëlsia”, shprehet deputetja socialiste Blerina Gjylameti, duke thumbuar në këtë mënyrë kolegët opozitarë.
Nuk dihet nëse deputetët e mbledhur rreth tavës së bakllavasë kanë arritur të konsumojnë të gjithë sasisë, por ka zëra se disa prej tyre janë kujdesur që të ruajnë disa copa edhe gjatë diskutimeve online mbi projektbuxhetin e Qeverisë.
Discussion about this post