Kryeministri në ikje i Britanisë së Madhe, Boris Johnson vazhdon pushimet i shkujdesur në Greqi, ndërkohë që opozita në Britani po “vlon”, duke e akuzuar atë se në thelb e ka lënë vendin “pa kokë” në javët e fundit të administratës së tij.
Mediat e huaja kanë publikuar foto të reja të kryeministrit britanik me familjen e tij në një liman të izoluar në Evia. Ai ndodhej i shtrirë në rërë teksa lexonte një libër.
Vendasit e habitur se si Johnson e kishte gjetur atë vend” të shkretë” thanë se ai dukej i shkujdesur ndërsa lexonte librin, kurse djali i tij 2-vjeçar luante aty pranë.
Një pushues tha: “Unë nuk e kam idenë se si Boris e gjeti atë plazh, edhe vendasit që kanë jetuar këtu për vite nuk e dinë atë.”
Kryeministri ishte parë më herët duke mbërritur në Aeroportin e Athinës në fundjavë dhe duke i mbajtur çantën fëmijës. Johnson javën e kaluar u kthye nga udhëtimi i tij i muajit të mjaltit në Slloveni me Carrie.
Discussion about this post