Vijon të jetë problematike situata në qarkun e Shkodrës, në malin e Shoshit dhe në aksin rrugor të Vermoshit për shkak të reshjeve të dendura të dëborës. Prej më shumë se dy javë këto zona vijojnë të jenë të izoluara, ndërsa institucionet përgjegjëse nuk bëjnë të mundur hapjen e këtyre rrugëve. Ndërkohë, përveç kësaj problematike, këto zona prej tre ditësh kanë mungesë të energjisë elektrike si pasojë e motit të keq. Rruga që të çon në Theth është bllokuar nga një ortek. Autoriteti Rrugor Shqiptar bën me dije e orteku ka rënë mbrëmjen e djeshme në Qafë Thore, ndërsa ka nisur puna për pastrimin e dëborës.
“Në Qafë Thore po punohet me mjete borëpastruese dhe me forca të shtuara për pastrimin e një orteku që ka sjellë edhe bllokimin e rrugës puna do të vazhdojë pa ndalur derisa aksi të bëhet i qarkullueshëm për mjetet”, njofton ARRSH.
Momentalisht nuk raportohet për probleme në të tjera akse rrugore në vend, teksa temperaturat e acarta kanë ‘mbërthyer’ vendin.
Discussion about this post