E habitshme, OSHEE nuk i paguan faturën e blerjes së energjisë një kompanie qysh nga viti 2012. U desh të hidhej në gjyq në Arbitrazh nga kompania zvicerane Energy Financing Team AG, pasi nuk ka paguar detyrimet dhe do të duhet ta dëmshpërblejë. Sipas raportit, OSHEE ka krijuar borxh me vlerën prej 7 milionë lekësh dhe 2 milionë lekësh kamatëvonesë. Pas vendimit të Arbitrazhit për padinë e kompanisë së huaj, Avokatura e Shtetit ka njoftuar OSHEE-në për një dëm në vlerën 8,367,087 Euro dhe 901,576 CHF referuar çështjes së arbitrazhit ndërkombëtar SCAI nr. 600491/2017, me palë paditëse Energy Financing Team AG dhe palë të paditur “OSHEE” SHA. Deri në zbardhjen e vendimit, OSHEE përballet me rritjen e interesave për këtë detyrim.
Vendimi
Me shkresën e Sekretariatit të Dhomës Ndërkombëtare të Arbitrazhit Zviceran (SCAI), OSHEE është njoftuar për çështjen nr. 600491 – 2017, që E. A.G kishte ngritur ndaj “OSHEE”, për kontratën e shitblerjes me energji elektrike të vitit 2012. Paditësi, E. A.G. ka pretenduar një shumë prej 6,139,637 Euro plus interesa dhe kosto (rreth 9 milionë Euro) për energjinë elektrike që nuk i është lëvruar OSHEE-së/ CEZ Shpërndarje në vitin 2012, për shkak se kontrata nuk është ekzekutuar plotësisht. OSHEE duhet të përgjigjej për pretendimet e ngritura brenda 30 ditëve nga data e njoftimit.
Më datë 11.10.2019, Tribunali ka marrë vendimin përfundimtar duke vendosur: Pranimin e pretendimeve të palës paditëse duke përcaktuar detyrimin e palës së paditur për të dëmshpërblyer palën paditëse në vlerën prej 6,139,637 Euro, për mos përmbushje të kontratës. Kësaj i shtohet interesi vjetor prej 5% për këtë dëmshpërblim i përllogaritur nga data 15 Tetor 2012 deri në kryerjen e plotë të kësaj pagese, detyrimin e palës së paditur për të paguar shpenzimet e procesit dhe për t’i rimbursuar paditësit këto kosto në vlerën prej 186,000 CHF, së bashku me interesin vjetor prej 5% për këtë vlerë, nga momenti i shpalljes së këtij vendimi deri në kryerjen e plotë të kësaj pagese. PO ashtu shtohen shpenzimet ligjore të palës paditëse në vlerën prej 705,682.04 CHF plus 43,361.58 Euro së bashku me interesin vjetor prej 5% të përllogaritur nga data e shpalljes së këtij vendimi deri në përmbushjen e plotë.
