Operatori i Shpërndarjes së Energjisë Elektrike vazhdon të thellojë krizën financiare në të cilën ndodhet. Në një vendim të Këshillit të ministrave bëhet me dije se, OSHEE ka marrë 2 kredi të reja, në shumën totale prej 30 milionë euro, që parashikohet të shkojnë për për financimin e kapitalit punues, në kuadër të nevojave për import të energjisë.
Në mbledhjen e fundit të zhvilluar Këshilli i Ministrave ka miratuar garancinë shtetërore në favor të 2 bankave për kontratën e kredisë të nënshkruar mes tyre dhe Furnizuesit të Shërbimit Universal, që është kompania që menaxhon procedurat e blerjes së energjisë, si dhe me OSHEE Group. Kredia e parë është nga Banka Amerikane e Investimeve, në shumën e 10 milionë eurove, ndërkohë që 20 milionë euro të tjera janë marrë nga Banka OTP Albania.
Kujtojmë se, këto nuk janë kreditë e para, që janë marrë Brenda një periudhë të shkurtër kohore për sistemin energjetik në vend. Para pak javësh u nënshkrua marrëveshja e huasë prej 50 mln euro, që do të përdoret për funksionimin e bursës së energjisë, si dhe konsolidimin e kompanive të krijuara nga ndarja e Operatorit të Shpërndarjes së Energjisë Elektrike.
Ndërkohë që, gjatë muajit tetor, ishte Operatori i Shpërndarjes së Energjisë Elektrike që mori një hua prej 70 mln euro nga Banka Evropiane për Rindërtim dhe Zhvillim, që do të shkojë për financimin e projektit për reagimin ndaj krizës së shkaktuar nga COVID-19.
Ky financim përbën një detyrim të drejtpërdrejtë për OSHEE-në, kundrejt BERZH-it, por në rast të pamundësisë për të shlyer detyrimet nga OSHEE-ja, detyrimet e kredisë do të duhet të paguhen nga buxheti i shtetit, mbështetur në marrëveshjen e nënshkruar të garancisë.
Discussion about this post